КОЦУР – Всоботу, 28. новембра, у орґанизациї коцурского КПД „ДОК” у Доме култури у Коцуре отримана главна програма тогорочного Дзешатого Фестивалу гумору и сатири „Коцурска чутка”, на хторей наградзени гумористично-сатирични роботи у трох катеґорийох. На „Чутки” ше представели гумористи и сатиричаре з Коцура, и ширше, алє и з иножемства.

За роботу на шлєбодну тему перше место подзелєли Томислав Мишир з Осиєку, з Горватскей и Милан Добровольски Ранчер з Коцура, док на задату тему „Ґенетска модификация” першу награду подзелєли Дюра Шефер Сремац з Руми и Милан Обренович з Роґатици, з Босни и Герцеґовини. „Соцкийову” награду” – за гумористичну роботу на руским язику – достал Дюра Салонтаї з Коцура, а додзелєни и два специялни награди, хтори достали Иґор Кришан зоз Зренянину и Дюра Папуґа з Руского Керестура. Наградзених преглашовал и уручовал им награди предсидатель „ДОК” проф. др Михайло Фейса.

Шицки роботи оценьовала комисия у составе Юлиян Пап, Аранка Медєши и Мария Горняк. Попри литературних роботох, вибрана и найдлугша чутка кукурици, а награду достал Антоний Чордаш, хтори ше змагал з чутку длугоку 28 центиметри. Чутки мерал Владимир Маґоч.

На „Коцурскей чутки” наступел и акустични музични состав „Бачки шницли” з Вербасу, хтори наглашел и гуманитарни бок Фестивалу, понеже и „Коцурска чутка” була уключена до гуманитарней акциї „Новембер за Ену”, у хторим ше збера пенєжни прилоги за лїченє Вербащанки Ени Нановски.

У павзи медзи „Чуточку” и „Чутку” нащивителє могли на видео-биму одпатриц роботи Бобана Станоєвича з Мелбурну, з Австралиї, хтори на тогорочним Фестивалу достал награду за найлєпшу карикатуру.

По законченю „Коцурскей чутки” виведзена представа „Круцина” Танкреда Дорста, у режиї Звонимира Павловича, Драмского студия РКЦ з Нового Саду, а Фестивал закончени з коштованьом єдлох з кукуричного етно-столу, хтори бул поставени у просторийох ДОД Коцур. Єдла за тоту нагоду пририхтали членїци Активу женох КУД „Жатва”.