НОВИ САД – Похвальнїци и Видовдански награди того року достали 586-еро школяре новосадских основних и штреднїх школох котри у школским 2016/2017. року освоєли награди на републичних и медзинародних змаганьох.
Медзи нїма и школяре з новосадских школох котри на тогорочним Републичним змаганю з руского язика освоєли даєдно место – Дина Мудрох, Яна Бодвански, Марина Грубеня и Ана Петкович. На додзельованю наградох були и їх наставнїци.
Награди и похвальнїци школяром на Петроварадинскей твердинї вчера уручели городоначалнїк Нового Саду Милош Вучевич и предсидатель Скупштини Городу Здравко Єлушич, а Вучевич виявел же праве тоти школяре будуца интелектуална елита Нового Саду и Сербиї.
– За потримовку тим младим людзом Город Нови Сад зоз свойого буджету видвоєл осем милиони динари и убудуце, на рижни способи, предлужи потримовац и помагац їх розвой и напредованє – гварел Вучевич.
