Найвисше припознанє за „златну свадзбу”

автор влдї 30. юлий 2016

Малженска пара Верунка и Данил Надь з Бачинцох тот рок буду паметац по означованю велького ювилея – 50 роки малженства, и особним папским благослову за їх „златну свадзбу”, хтори додзелює Папска апостолска пенитенцерия з Ватикану. Бачински парох о. Дарко Рац им тото окремне припознанє шветочно придал у бачинскей церкви.

– Анї зме ше нє наздавали же наш ювилей означи и таке високе припознанє хторе ше ридко достава. Парох о. Дарко на Служби Божей пречитал же зме достали папски благослов и то за нас барз значне. Ми прето барз подзековни. Источашнє то припознанє шицким вирним на тим просторе, а нам обовязка ище баржей служиц нашей Церкви –гварели щешлїви Верунка и Данил Надь, хтори и член Церковного одбору.

Верунка активна на Службох Божих у шпиваню и подзековна є же ю и Оленку Кишову, Єлку Папуґову, Славицу Папуґову и Єлену Загорянскову учели церковному шпиваню Анґела Канюх и Маґда Страценскова.

– Зберали зме ше на парохиї, а помагал нам и наш парох же бизме лєпше научели шпивац. За дакус вецей як єден мешац ученя звладали зме шпиванє цалей Служби Божей, шпиваме и панахиди и цо уж треба. Прешло тому уж и три роки як зме ше научели шпивац. Тиж, ми жени ше стараме и о красному випатрунку церкви, пораєню и прикрашованю, поряднє през рок и за векши швета, кед церква ище красша – гвари Верунка.

(Опатрене 122 раз, нєшка 1)