Найлєпшим школяром општини Вербас уручени награди

147 Опатрене

ВЕРБАС – Найлєпши школяре основних и стреднїх школох у општини Вербас достали вредни награди, котри им на шветочносци у сали Скупштини општини Вербас уручела заменїца предсидателя Општини Вербас Тияна Алексич.

Наградзени 85 ношителє дипломи „Вук Караджич” и 15 школяре ґенерациї. Школяре ґенерациї достали лаптоп рахункари, а вуковци екстерну батерию и бездротово слухалки.

З тей нагоди Алексичова школяром винчовала на посцигнутим успиху и пожадала им же би и у будучносци витворйовали найлєпши резултати. Уручени награди представяю награду за винїмковосц школярох, гварела, а указане знанє, вредна робота и закладанє, як и одвичательне сполньованє школских обовязкох вредносци котри треба ценїц, почитовац и промововац. Вельки заслуги припадаю и просвитним роботнїком котри уложели вельо труду, роботи и знаня же би школяре витворели визначни резултати, а Општина Вербас предлужи инвестовац до лєпших условийох образованя понеже инвестициї творя дзецом нагоди за успишнєйши живот, заключела Алексичова.

Ношителє Вуковей дипломи у Основней школи „Братство єдинство” у Коцуре то Патриция Будински, Томислав Бесерминї, Петар Буша, Алекса Ґрандич, Филип Яким, Душан Ґубаш, Надя Бабич, Лена Шкрбич и Марина Ґакович, а школярка ґенерациї Мартина Уйфалуши.

ПОВЯЗАНИ ТЕКСТИ