НАР роби, едукує, повязує

автор Мартица Тамаш 27. новембер 2016

За шейсц роки роботи Новинарска асоцияция Руснацох (НАР) ма 11 проєкти: мониторинґ, 4 едукациї, 3 нєзависни авдио продукциї,  у цеку виглєдованє, формованє Реґионалней медийней мрежи, пририхтани перши видавательни проєкт и витворене успишне сотруднїцтво з явним и нєвладовим сектором и медиями.

Як добродзечне, нєвладове и нєпрофитне здруженє, Новинарска асоцияция Руснацох (НАР) основана на инициятиву Одбору за информованє Националного совиту, пре витворйованє цильох з обласци защити и афирмованя меншинских правох у обласци информованя рускей националней заєднїци. На сновательней скупштини, хтора була 29. мая 2010. року у Заводзе за културу войводянских Руснацох, було 23-йо новинаре и роботнїки у медийох на руским язику: зоз Руского слова, Радио Нового Саду и Телевизиї Войводини, ЯП за информованє Вербас, ИПЦ Кула. Робота рушела у добрей атмосфери сотруднїцтва и колеґиялносци, хтори и нєшка главна прикмета и способ функционованя Здруженя.

На сновательней скупштини прилапени Статут, вибрани предсидатель, управни и надпатраюци одбор. Уж у септембру 2010. року НАР реализує проєкт „Од кампанї по довириє”, хтори облапел провадзенє и анализу медийней кампанї перших нєпоштредних виберанкох за  национални совити у Сербиї.

Як и кажди други початок, и тот мал нови ситуациї и глєдал окремну пошвеценосц и знанє. Рок 2011. бул у знаку реґистрованя и ришованя технїчних стварох, афирмованя здруженя, а 2012. року НАР конкуровал зоз своїма проєктами на конкурсох секретариятох и министерствох, алє нє було успиху. Пременєта стратеґия, так же од 2013. року потераз члени НАР-у мали и надосц идеї за проєкти и успиху на конкурсох. У 2013, 2014. и 2015. року НАР орґанизовал фахово усовершованя за новинарох и редакторох друкованих и електронских медийох на руским язику. Едукациї провадзели од 25 до 35 новинаре, а проєкти финансовал Покраїнски секретарият за културу и явне информованє Влади АПВ. Партнер на проєктох була Новосадска новинарска школа, у сотруднїцтве зоз Одсеком за медийни студиї Филозофского факулета у Новим Садзе.

Едукациї отримовани  у Заводзе за културу войводянских Руснацох, потримал их Национални совит, прейґ Одбору за информованє и Одбору за службене хаснованє язика и писма.

За НАР барз успишни бул 2015. рок. Почало ше зоз нєзависну продукцию. Проєкт правеня 7 радио емисийох под назву „Приклади добрей пракси – драгоказ розуменя” финансовал Покраїнски секретарият за медзиреґионалне сотруднїцтво и локалну самоуправу, а реализовани є у партнерстве зоз ЯМУ РТВ, Рубрику на сербским язику и локалнима радио станїцами: Радио Кула, Радио Оджак, Радио Нови Бечей и Радио Беочин. НАР подписал Спорозуменє о сотруднїцтве и потримовки зоз орґанизацию ТАКСО – Технїчна потримовка орґанизацийом цивилного дружтва зоз Беоґраду хтора оможлївели преклад емисийох на руски язик и тоти емисиї емитовани на програми Рубрики на руским язику ЯМУ РТВ.

У септембру 2015. року у сотруднїцтве зоз Ресурсним центром Гражданских инициятивох НАР орґанизовал роботню о писаню проєктох, управяню з проєктами и способе умрежованя зоз орґанизациями цивилного дружтва.

У 2016. року НАР мал вельо активносци и красни проєкти. Участвовал на Округлим столє „Стратеґия Руснацох и єй имплементация”, хтори орґанизовал Вивершни одбор Националного совиту Руснацох и постал член Войводянскей инициятиви за ЕУ, хтора ше будзе занїмац зоз одредзенима прегваряцкима поглавями и сотрудзовац зоз Националним конвентом за прегварки за приступанє Сербиї ЕУ.

Проєкт „Миниятури о макси темох”, друга нєзависна авдио-продукция НАР-у, финансовал Реконструкция женски фонд з Беоґраду, а облапя продукцию 12 радио емисийох на сербским и на руским язику. Емисиї емитовани на рубрикох на сербским и руским язику РНС ЯМУ РТВ.

Проєкт „Доприношенє припаднїкох рускей националней заєднїци розвою Нового Саду” реализовани з потримовку Управи за културу Городу Нового Саду, а емисиї емитовани на Трецей програми РНС ЯМУ РТВ

До конца того року, з потримовку нашого Националного совиту, НАР ма три проєкти: формованє Реґионалней медийней мрежи  редакцийох руских медийох зоз Сербиї, Горватскей, Мадярскей, Польскей и Словацкей, виглєдованя зоз обласци квалитета програми приватизованих локалних електронских медийох, хтори маю програму на руским язику, а роби ше и на видавательним проєкту под роботну назву „65 роки историї Рускей редакциї Радио Нового Саду”.

Од маєтку НАР ма лаптоп и друковач. НАР нє розписує конкурси и нє дава роботу нїкому, алє ма ядро членох хтори маю идеї, сцу и знаю робиц и дзечнє прилапя до свойого тиму шицких хтори маю идеї за проєкти и хтори провадза конкурси и маю инициятиву, бо кажде вец водзи свой проєкт и прави свой тим, и ма и одвичательносц и заслуги. У 2016 року членарину од 200 динари уплацели 36 новинаре и вони на Скупштини, после управного и надпатраюцого одбору одлучую о плану роботи, звитох о роботи и финансийних звитох.

Свою роботу НАР планує у рамикох Статута здруженя, прешенствено членох хтори дефиную цилї и дїялносц здруженя. Плани за далєй єст надосц: пестованє и розвиванє нєзависней авдио и визуалней продукциї, заєднїцки проєкти зоз медиями зоз реґионалней мрежи медийох, хтори буду у функциї цо лєпшого информованя Руснацох у реґионє, запровадзиц новинарску награду за новинарох руских медийох.

Становиска висловени у тим тексту виключно авторово и нє вше одражую ушорйовацку политику новинох „Руске слово”.

(Опатрене 152 раз, нєшка 1)