На початку два премиєри

автор опс/зам
905 Опатрене

НОВИ САД – У Новим Садзе вчера вечар, 4. децембра, почал Тринасти Руски фестивал малих сценских формох „Дюра Папгаргаї”, а тирва по нєдзелю, 6. децембер. Участвую шейсц театрални представи, з хторих 4 на Фестивалє буду мац свойо премиєри. Того року нєт монодрами и шицки представи з вецей ґлумцами.

Вчера вечар виведзени два представи – „Нинджа у тензиї 2” автора и режисера представи Иґора Пушкаша, у продукциї Драмскей секциї КУМ з Коцура и „Дакому мац, дакому мачоха” Владу Нярадия, у режиї Аранки Медєши, а у продукциї Етно-клубу „Одняте од забуца”, тиж з Коцура.

У представи „Нинджа у тензиї 2” ґлумя двойо дзеци – Катарина Кулич и Никола Салонтаї, та старши, сам автор и режисер Иґор Пушкаш. Представа „Дакому мац, дакому мачоха” дуодрама, а ґлумя Моника Гарди и Любомир Медєши. Обидвом то були перши виводзеня на сцени.

Нєшка на Фестивалє буду виведзени представи „Сезона лову на ловара” Драмского студия АРТ Дому култури Руски Керестур и „Як забиц предсидателя” Руского народного театру „Петро Ризнич Дядя, хтору РНТ витворел у копродукциї з вербаскима „Карпатами”.

На ютре, на нєдзелю, 6. децембра, на Фестивалє буду представи „Атак на идентитет” Драмского студия Шид и „Круцина” Драмского студия Руского културного центру Нови Сад.

Фестивал того року нє змагательни, а як и дотераз, отримує ше го у Театралней сали Ґимназиї „Лаза Костич”. Перша представа почина на 19 годзин.

Фестивал у Календаре репрезентативних манифестацийох Националного совиту Руснацох, а орґанизую го Матка-Дружтво Руснацох Нового Саду-Войводини и Городски одбор Рускей матки Нови Сад, з финансийну потримовку Городу Нови Сад, АП Войводина и Националного совиту Руснацох.

З представи „Нинджа у тензиї 2”, у ґалериї з тей и з дуодрами „Дакому мац, дакому мачоха”

ПОВЯЗАНИ ТЕКСТИ