На Републичним змаганю з руского язика перши места школяром з Керестура и Нового Саду

автор тах
1.1k Опатрене

КОЦУР – Всоботу, 28. мая, у Коцуре отримане 16. Републичне змаганє з руского язика и язичней култури. Домашнї Змаганю була Основна школа „Братство єдинство”, а орґанизаторе Министертство просвити, науки и технолоґийного розвою Републики Сербиї и Дружтво за руски язик, литературу и културу (Дружтво).

Свойо знанє з руского язика и язичней култури указали 19-еро школяре седмих и осмих класох з 10 школох у 8 местох – 11-еро котри руски язик виучую у порядней настави и 8-еро котри руски язик виучую як виборни предмет, з елементами националней култури. На Медзиокружним змаганю 3. априла, отриманим тиж у Коцуре, пласман на Републичне виборели 22-ойо школяре, медзитим тройо тераз були оправдано одсутни.

Змаганє отворели директорка коцурскей Школи Славица Байор, секретар-заступнїца Дружтва Ирина Папуґа и представителька Покраїнского секретарияту за образованє, управу, предписаня и национални меншини-заєднїци Наташа Перкович, а на отвераню присуствовала и предсидателька Одбору за образованє Националного совиту Руснацох Мелания Римар. Тести за руски язик за школярох з порядней настави пририхтал проф. др Юлиян Рамаш, а за школярох з виборней настави професорка Мелания Сабадош.

У катеґориї школярох котри руски виучую у порядней настави, у конкуренциї седмей класи перше место освоєла Соня Балїцки з Руского Керестура. Друге место освоєли Давор Хома и Теодора Новакович з Руского Керестура, а треце место Лидия Чапко з Дюрдьова.

У конкуренциї осмих класох у спомнутей катеґориї перше место освоєли Керестурци Мартина Афич, Иґор Маньош и Иван Чизмар, друге Марияна Мали з Коцура, а треце Марко Буила, тиж з Коцура.

У катеґориї виборней настави, дзе ше вєдно змагали школяре зоз седмей и осмей класи,  перше место освоєла Яна Бодвански з Нового Садудруге Ана Петкович, тиж з Нового Саду, Дина Мудрох зоз Сримскей Каменїци, Сара Мармила з Кули и Александар Мученски з Вербасу, шицки з осмей класи,  а треце место освоєли Мартина Грубеня з Нового Саду, Анастазия Козар з Кули и Єлена Иван зоз Савиного Села, зоз седмей класи.. 

На основи Календару змаганьох спомнутого министерства, исти дзень отримани и републични змаганя зоз сербского, мадярского, словацкого, румунского, горватского, бошняцкого и болгарского язика. 

ПОВЯЗАНИ ТЕКСТИ