Нєшка на 13 годзин хованє Василя Мудрия

автор зам
937 Опатрене

ШИД – Нєшка, 23. юлия, з каплїчки на Руским теметове у Шидзе на 13 годзин будзе поховани Василь Мудри, котри ше упокоєл вчера вноци у Шидзе, у 87. року живота.

Василь Мудри, наш визначни просвитни роботнїк, писатель, новинар, редактор, режисер, дакедишнї позарядови активиста у рускей просвити и култури народзени 13. марца 1930. року у Дюрдьове, а од 1958. року жил у Сриме, у Шидзе, дзе робел у вецей просвитних установох, а окреме и у култури Руснацох у Сербиї и Горватскей.

Писал писнї за дзеци и за старших, литературни прикази и школски учебнїки. Писнї му обявйовани и на сербским, словацким, мадярским, румунским, македонским и українским язику. У нашей и другей периодики обявел коло 300 писнї за дзеци и вецей як 70 за одроснутих, а „Руске слово” му обявело два збирки поезиї за дзеци – „Подшнїжнїки викукую” 1973. року и вибор з його поезиї за дзеци „Будзенє яри” 2014. року.

Заступени є у вецей антолоґийох поезиї, автор є и велїх текстох за композициї, дзевец читанкох, учебнїкох и школских лектирох за наставу руского язика.

Бул активни у Дружтве за руски язик, литературу и културу и у Фестивалє култури „Червена ружа”, дзе бул и руководитель манифестациї за дзеци „Червене пупче”.

ПОВЯЗАНИ ТЕКСТИ