Нє лєгко дзелїц правду на горуцих теренох

автор маз 27. авґуст 2016

На Ноцним турниру у малим фодбалу, хтори у Руским Керестуре закончени концом юлия, скоро кажде змаганє судзели млади фодбалски судийове Деян Надь Кичо и Иван Чапко Чапе. Обидвоме маю положене за судию трецей катеґориї, а тераз судза у пиятей лиґи. Но, любели би напредовац, та о даскельо роки судзиц голєм у Войводянскей лиґи.

Їх фахи нє вязани за спорт, алє понеже тренирали фодбал, Иван и Деян ше пред двома роками надумали опробовац и як фодбалски судийове. Иван ма закончену Електротехнїчну школу, а роби у ставяльнї у Керестуре, док Деян закончел Машинску школу и тераз роби у НИС-у у Новим Садзе.

– Понеже ридко кеди маме судийох з Керестура, Борис Шайтош нам препомнул же би ми могли покладац у Фаховней судийскей орґанизациї Кула. Уж даєдни хлапци з Керестура пред тим покладали, алє после нє судзели. У кулскей општини нас єст до 15 судийох у вецей лиґох. Перше зме були дочасово судийове. Муши ше пол рока судзиц даскельо змаганя же би ше потим могло покладац за судию трецей катеґориї, цо зме тераз. У Кули зме мали пририхтованя, дзе зме покладали за дочасових судийох, а у Фодбалским союзу Зомбор за судийох трецей катеґориї. То було и озбильнєйше, понеже ше там поклада и же би ше могло буц и главни судия – бешедую Деян и Иван и додаваю же Деяна тота робота и скорей прицаговала, а Иван ю полюбел з часом.

ЛЄБО ШИ БАВЯЧ, ЛЄБО ШИ СУДИЯ

И Иван и Деян тренирали фодбал у „Русину”, дзе Иван бавел аж до тераз. Но, понеже ше нє шме источашнє буц и судия и бавяч у истей лиґи, од тей сезони ше и вон, як и Деян, опредзелєл же будзе лєм судия.

– Я и потераз судзел, алє понеже сом сцел и бавиц, судзел сом у шестей  лиґи же бим могол бавиц у „Русину”, у пиятей. Кед сом сцел напредовац, мушел сом дацо зохабиц, та од тераз и я, як и Деян, будзем судзиц у Подручней лиґи Зомбор. Увидзим як ми будзе исц, а лєгко сом ше годзен врациц бавиц кед нє будзем задовольни – визначує Иван.

Як гваря, виплаци ше буц судия, бо дакеди судза и два раз до тижня, алє векшини то, заш лєм, нє главна робота. Потераз Иван судзел на коло 20 стретнуцох у лиґи, док Деян на коло 35.

– Штварток дополадня мушиме наволац до Союзу же би нам поведли дзе нас положели судзиц и чи будземе главни, чи помоцни судийове. Доставаме 2 000 динари по змаганю, а и драгово трошки нам плацени. Тераз зме судийове трецей катеґориї, алє дас о рок-два нас вироятнє почню „ґурац” далєй. Мушиме мац одсудзени 15 змаганя же бизме потим могли покладац у Новей Пазови за судийох другей катеґориї – гваря вони и додаваю же би любели напредовац голєм по Войводянску лиґу.

– На 16 роки мож почац судзиц. Нє муши ше пред тим буц фодбалер, алє би було лєпше. Мож напредовац до 27-28 рокох. Кед ше вчас почнє судзиц, вец мож досц посцигнуц, а ми почали познєйше. Я тераз мам 22, а Иван 21 рок. Думам же найдалєй можеме дойсц по Войводянску лиґу. Там фини фодбал и квалитетнєйша лиґа. Вшелїяк же бизме любели напредовац покля зме годни, алє цо далєй, то чежше – мушиш мац вязу, лєбо пенєжи – наглашує Деян.

СУДИЙОВЕ ДОБРЕ ЗАЩИЦЕНИ

34 Ivan i DejanЯк гваря обидвоме, мали дакус и трему кед почали судзиц, бо ше судийове наслухаю вшелїячини – и од бавячох и од навиячох, а часто их и физично нападаю.

– Млади зме, та ше можебуц дакеди ище вше злєкнєме, алє тераз судийове барз защицени, та знаме же нам нє може нїхто нїч. Нє слухаме цо нам докричую, алє ше сконцентруєме лєм на змаганє. Ми з публику нє маме нїч кед нам дацо доруцує, бо им нє можеме дац анї картон, анї опомнуц их, а кед бавяч дацо пове, лєбо пороби, вец уж иншака приповедка – визначую Иван и Деян. Но, припознаваю же гоч почитую правила, затераз су углавним досц благи ґу бавячом.

– Нє сцеме буц  усприч бавячом, бо ище вше напредуєме. Кед бизме пришли ознова даґдзе судзиц, од початку би ше чувствовало прицисок же зме дакому пред тим дали картон накадзи нам дацо гварел, та найвироятнєйше ознова будзе нападац. У даєдних местох ше крашнє ґу нам справую, а даєдних, боме, и як нє ґу людзом – наглашую вони.

Явна тайна же нєшка велї змаганя намесцени, а судийове подплацени. Но, Деян и Иван гваря же ше ище нє були у такей ситуациї.

– Кед бизме таке дацо поробели и кед би ше то пречуло, тоти у Союзу цо нас делеґую би нас лєбо покарали, лєбо поведли же нє вредзи же бизме напредовали, бо кед пойдземе горе, будземе ище корумпиранши – обяшнюю вони и додаваю же кед судза там дзе бави „Русин”, трудза ше буц нєпристрасни.

– Обидвоме зме там бавели и шицких познаме. Патриме же би були защицени, алє заш лєм, мушише тримац критериюм и буц професийни. После змаганьох слухаме совити других же чи зме добре судзели. Ище зме нє таки искусни, та ше дакеди случи же ше после даєдного змаганя ше и двоїме ше чи зме дацо одсудзели як треба. Алє, шицко то нормалне – заключели на концу Иван и Деян.

И ТЕОРИЙНЕ ЗНАНЄ, И ФИЗИЧНА КОНДИЦИЯ

 Окрем доброго теорийного знаня, фодбалски судийове муша буц и у добрей физичней кондициї, як и фодбалере.

– Мали зме и теорийни и физични тести на покладаньох, хтори маме и на кажди пол рока. Кондицию отримуєме так же бежиме вечарами по валалє. Маме кнїжки з правилами, алє найвецей помага пракса, як и у шицким. На змаганьох мушиме буц и добре сконцентровани, одпочинути и нєпристрасни. Од опреми вше мушиме мац чарни патики, штуцни, шорц, дрес, картони, пищок, пенкало и нотес, заставку за помоцного судию, а гварене нам же би було добре и кед бизме були обритвени вше кед судзиме – толкую вони двоме.

(Опатрене 309 раз, нєшка 1)