Обнова дзецинскей заградки

автор влдї 7. юлий 2016

По планованей динамики роботох на обнови будинку Лєтнєй владическей резиденциї у Шидзе, у цеку роботи адаптованя просторийох хтори хаснує Предшколска установа „Єлица Станивукович-Шиля”. Першобутно обити мури и повиберани стари вислужени патоси, а вец положени бетон, а мури, понеже покладзена нова електро-инсталация омалтеровани, а на повали покладзени риджипс плочи. И простория потерашнєй кухнї иншак ушорена, так же єдна часц „одвжата” же би ше направело нови санитарни ґузел, так же дзеци убудуце нє буду мушиц исц до тоалетох на конєц конку у часци такволаного анексу будинка.

Дзецинска заградка од єшенї будзе хасновац ище єдну просторию на поверху, окрем потерашнїх трох, и велького гола. Тиж дознаваме же будзе ришени и проблем зогриваня так же цаганє древох на поверх и топенє до пецох остава прешлосц, а будзе инсталоване такволане „патос зогриванє”. У рамикох обнови будинку на анексу покладзени метални спиралнии ґарадичи, так же тота часц будинку будзе мац окремни уход.

После законченя сапомнутих роботох, по плану, остава же би ше инсталовало централне зогриванє и на тот способ би ше ришело проблем зогриваня цалого будинку. Здогаднїме же зяри омалтеровани мурик опрез порти и кед ше цалком висуши, будзе обилєни. Тиж, поставена и нова желєзна капура и роштелї на мурик, цо допомло ище красшому випатрунку резиденциї и тей часци Шиду.

(Опатрене 106 раз, нєшка 1)