„Одата за витор” Руского КУД

автор маф
878 Опатрене

РУСКИ КЕРЕСТУР – На Драмским мемориялє Петра Ризнича Дядї вчера одбавена треца дзецинска представа – „Одата за витор” Роберта Такарича, хтору у режиї Александри Лендєр виведли дзеци з Руского КУД „Др Гавриїл Костельник” з Кули.

Представа наменєна дзецом котри уходза до тинейджерского периоду и нєлапшно спознаваю перши залюбйованя, перши ганблїви поцилунки, у чим им „помагаю” нараторе.

Младим ґлумцох улоги нє були страни, та були прешвечлїви, медзитим, представа би була и лєпша кед би ше з дзепоєднима ґлумцами дакус вецей поробело на дикциї,  бо  нє вше могло чуц и розумиц и текст.

У представибавели Себастиян Гарди, Весна Вонич, Мирослав Стричко, Лїляна Кнежевич, Дияна Канюґа, Филип Канюґа, Желько Стричко и Мартина Дер.

Представа мала добру динамику, чому допомага и одлична музика (у виборе режисерки), на цо публика барз добре реаґовала. Режисерка Лендєрова обдумала и сценоґрафию (представа визуелно добре випатра), а подписує и преклад тексту на руски язик. У витвореню представи и роботи з дзецми режисерки помагала Амалия Ковач, котра вибрала и костими, а ефекти и шветло пририхтал Бранко Амиджич.

На вчерайшей представи на Мемориялє присуствовал и предсидатель кулского Дружтва Владимир Бучко, а шицки учашнїки од орґанизатора на дарунок достали кнїжку приповедкох и леґендох „Нєбо керестурске” Ирини Гарди Ковачевич, хтору им обезпечела НВУ „Руске слово”.

ПОВЯЗАНИ ТЕКСТИ