Од шлїдох у бетону по замерковану скулптуру

автор Михаил Рамач 26. юлий 2015

Иван Киш зоз Дюрдьова студент трецого року на Академиї уметносцох у Новим Садзе, на Департману подобових уметносцох, напрям – скулпторство, у класи професора Борислава Шупута. Активни є и у малярстве, участвує на подобових колонийох, роботи викладал на рижних виставох, мал самостойну виставу у Заводзе за културу войводянских Руснацох, а у юнию того року достал награду за найлєпши акт у природней велькосци.

Перши крочаї ґу уметносци Иван направел ище у дзецинстве. Ище як дзецко ше любел бавиц з рижнима материялами и правиц з нїх предмети. Папер, клайбас, крейдочки и фломастери му були наймилши бависка.

– Одмалючка сом любел рисовац. Вельку улогу у моїм подобовим унапрямованю мали мойо дїдо и баба, хтори ми обрацали увагу на розличносц формох и велькосцох при рисованю. Кед мойо домашнї дацо будовали, барз сом любел зохабяц шлїди у нєосушеним бетону. Тиж сом ше любел бавиц и зоз остатками будовательного материялу з хторого сом, за себе, муровал рижни мали предмети. Ниа дзе ме то одведло – гвари Иван.

Иван ходзел до руского оддзелєня у ОШ „Йован Йованович Змай” у Дюрдьове,  цо му нєшка на вельки хасен. Кед пришол час же би вибрал штредню школу одлучел же ше будзе пририхтовац за упис до штреднєй школи за дизайн „Боґдан Шупут” у Новим Садзе, хтору и закончел. По законченю штреднєй школи „Боґдан Шупут”, напрям – ґрафични дизайн и пропаґанда, Иван похопел же го робота у компютерских програмох нє прицагує, алє го цикави ручне творенє. Роздумуюци о своєй дальшей драги перши вибор му бул Филозофски факултет, а аж познєйше новосадска Академия уметносцох.

Иван за свойо роботи уж достава награди

Иван за свойо роботи уж достава награди

НЄ ДОСЦ БУЦ ТАЛАНТОВАНИ

 – Жадал сом буц уметнїцки критичар, алє уж после першого року на филозофиї сом ше предумал. Понеже Филозофски факултет нєдалєко од Академиї уметносцох часто сом там заходзел, интересовал ше и розпитовал. Одлучел сом ше уписац на Академию, напрям – малярство, алє ше ми нє удало. Розчаровал сом ше и на кратко забул на уметносц. Медзитим, после двох, трох рокох уметносц ше ми ознова почала круциц по глави. У тим чаше сом бул заняти у єдней столарскей роботнї и там сом у паузох часто рисовал по древу. То наисце єдна интересантна робота, барз ми помогла у живоце, алє сом ше ознова почал рихтац за упис на Академию. Тераз сом ше одлучел за напрям – скулпторство и поспишело ше ми уписац ше – бешедує Киш.

 НАМАГАНЄ НАГРАДЗЕНЕ

 У фебруару того року Иван подаровал дюрдьовскей школи бисту Йована Йовановича Змая, по ким школа достала назву, а же його робота наисце квалитетна гутори и тото же биста виложена у главним уходзе до школи.

У Ґалериї подобовей уметносци дарунок-збирки Райка Мамузича у Новим Садзе 25. юния отворена Закончуюца вистава роботох студентох штвартого року на Департману подобових уметносцох у Новим Садзе. На отвераню вистави додзелєни награди найуспишнєйшим студентом того Департмана школского 2014/2015 року. Наградзени и Иван Киш. Достал награду „Вельки акт”, хтору додзелює Катедра за скулпторство, за комплетни виробок скулптури. Змаганє за виробок скулптури тирвало єден семестер, а участвовали седмеро студенти зоз трецого року. Шицки учашнїки мали исти модел, жену штреднїх рокох, а задаток бул виробиц акт тей жени у природней велькосци у технїки зоз глїну.

Того року Иваново роботи тиж могли видзиц и нащивителє Еґзиту, понеже нєдалєко од главней бини були виложени вибрани роботи найлєпших студентох новосадскей Академиї уметносцох. Иван треба же би ше на єшень уписал на штварти рок Академиї, а гвари же то нє конєц.

– Любел бим ше уписац на мастер студиї у Варшави, и уж сом почал робиц на тим. Опредзелєл сом ше за Варшаву прето же то єдна з колїскох уметносци, а тиж и пре малу язичну бариєру – закончує Иван Киш.

Биста Йованa Йовановичa Змая

Биста Йованa Йовановичa Змая

(Опатрене 112 раз, нєшка 1)