Ожило велїчезне зданиє

автор влдї 11. децембер 2015

Будинок Лєтнєй владическей резиденциї у Шидзе адаптовани по фазох, з рока на рок, спрам того кельо було средства, и так уселєна канцелария Служби хижного допатраня Каритасу, у прижемю ушорена велька простория за потреби Здруженя за потримовку родичом дзецох з окремнима потребами „Отворене шерцо” и помали почали приходзиц и други госци хтори Резиденцию хасную як ноцнїк.

Уж даскельо роки на початку авґуста ту маляре под час подобовей колониї „Руски двор”, а у порти ше отримує Фестивал тамбурових оркестрох „Мелодиї Руского двору”. Ноцовали ту и госци зоз Камюнки зоз Словацкей Републики, потим ґлумци з просторох бувшей Югославиї у рамикох фестивала „Свратиште у позориште” влонї, а и того року. У резиденциї були змесцени и маляре подобовей колониї хтору орґанизовало горватске КУД зоз Шиду.

Тиж так , на уровню нашого Апостолского еґзархату у Резиденциї ше уж даскельо роки отримує духовни вежби за наших паноцох.

Влонї резиденция була дом и жительом Ямени хтори ше мушели сколонїц зоз своїх обисцох кед у маю тот валал на побрежю Сави залапели вилїви. И того року, як тирва масовне висельованє до заходних жемох, на два заводи у Резиденциї пребували волонтере зоз Ческей Републики, коло 30 особи хтори помагаю миґрантом. Початком новембра Резиденция погосцела и фодбалерох зоз Ґерлахова зоз Словацкей Републики, хтори пришли до Бикичу возвелїчац ювилей – 30 роки иснованя ОФК Бикичу.

През рок у нєй отримани и поетски вечари, роботнї и вистави.

У просторийох Резиденциї, схадзки, односно Скупштини доо „Руски двор” звичайно два раз рочно, з яри и концом рока, отримую и нашо винїцаре. Тиж так, у пиньвици ше у гордовох чува вино.

Понеже ше приходзи жима, як гвари парох о. Михайло Режак, активносци будзе менєй, а як ше будзе приблїжовац яр, Резиденция ознова ожиє.

(Опатрене 60 раз, нєшка 1)