Означене швето Михала у коцурскей церкви

автор ол. русковски
443 Опатрене

КОЦУР – У грекокатолїцкей церкви Успения Пресвятей Богородици у Коцуре всоботу, 21. новембра, означене швето Архангела Михаила – Михала.

Вельку Службу Божу на 10 годзин служел парох коцурски о. Владислав Рац. Молитва и участвованє на богослуженьох помагаю же би чловек духовно роснул и же би нє отупел, визначел у казанї парох о. Рац, а шицких присутних парохиянох здогаднул на Архангела Михаила як оподобенє ангелох послуху и вирносци Господу Богу.

– Шветкуйме з чистим шерцом и з радосцу свойого шерца, же можеме славиц и нєшка Господа Бога, гоч таки часи. И праве, же бизме послухали Божо слова, як людзе добрей дзеки котри веря Господу Богу и тим котрих вон посила, ангелом хранительом, як постреднїком, котри потримую чловека и буду на ньго мерковац през цали живот. Ангел Божи тот котри Божи, ангел послуху, ангел слави, ангел мира и радосци – гварел у казанї парох о. Владислав Рац.

Пре хвилькову епидемиолоґийну ситуацию зоз коронавирусом, шицки вирни ше притримовали предписаних мирох защити.

ПОВЯЗАНИ ТЕКСТИ