СТАРИ ЯНКОВЦИ/ПЕТРОВЦИ – Всоботу и внєдзелю, 19. и 20. септембра, у Старих Янковцох у Републики Горватскей отримани перши зашеданя Шветовей ради Русинох/Руснацох/Лемкох (ШР РРЛ) и Шветового форуму русинскей младежи (ШФРМ) у нових зволаньох. На обидвох зашеданьох участвовала векшина представительох членских орґанизацийох Шветового конґресу РРЛ, окрем представительох з Польскей и Зєдинєних Америцких Державох и Канади
Зоз схадзку Шветовей ради РРЛ предшедовал єй нови предсидатель Штефан Лявинец з Мадярскей, а зоз ШФРМ нова предсидателька Светлана Петрецки з Румуниї, котри вибрани на тогорочним Тринастим Шветовим кнґресу РРЛ у Румуниї.
На зашедаю ШР РРЛ зоз Сербиї участвовал Дюра Папуґа, предсидатель Рускей матки (РМ), а на зашеданю ШФРМ участвовал предсидатель Форуму младих РМ Борис Фейди. У делеґациї РМ на збуваньох у Старих Янковцох и Петровцох участвовали и Миломир Шайтош, заменїк предсидателя РМ и проф. Славко Пап, член Месного одбору РМ у Руским Керестуре
Найзначнєйша увага на зашеданю Шветовей ради РРЛ у Старих Янковцох була пошвецена анализи и оцени XIII Шветового конґресу РРЛ и VII Шветового форуму русинскей младежи и догварки о реализациї заключеньох з Резолуциї и Преглашеня ШК. На схадзки заключене и же би ше обнавело вимоги ШР за запровадзованє порядних и мастер студийох русинскей фолклористики на Пряшовским универзитету у на Универзитету у Нїтри, а до Уряду Влади Словацкей будзе послата вимога за потримовку организованю младежских кампох у Домаши у тей жеми, як и о покровительстве III Медзинародного фестивалу мултижанровей русинскей музику, хтори того року будзе отримани у Бардейове.
ШР дала потримовку за покровительство першого Медзинародного руского/русинского филмского фестивалу „Русинфест”, хтори би мал бул отримани у першей половки наступного року у Бачинцох, у орґанизациї КПД „Драґутин Колєсар”, а зоз спонзорством Општини Шид.
На зашеданю Шветового форуму русинскей младежи у Старих Янковцох окремна увага дата на вирабянє плану и програми роботи у шицких членских орґанизацийох, а отримани и два роботнї – „Народни писнї Панонских Руснацох” и „Народне облєчиво Панонских Руснацох”.
По зашеданьох обидвох целох, члени делеґацийох-членїцох ШК РРЛ у Петровцох присуствовали на Пиятей Културней манифестациї (КМ) „Кед голубица лєцела”, у орґанизациї Дружтва „Руснак” з Петровцох, хторе и представитель Руснацох Горватскей у ШК РРЛ.
Пред програму, у голу Дому култури у Петровцох отворена Фото-вистава етнолоґа Ивана Чижмара зоз Свиднїку, зоз Словацкей, з назву „Русинске народне облєчиво Пряшовского краю”.
На початку програми присутних и госцох на КМ „Кед голубица лєцела” привитали предсидатель Месного одбору Дружтва „Руснак” у Петровцох Томислав Рац, предсидатель Дружтва „Руснак” и подпредсидатель ШР Мийо Шайтош, предсидатель ШР Штефан Лявинец и заступнїк националних меншинох у Соборе Горватскей Велько Кайтази, котри ю и официйно отворел.
На Манифестациї наступели ансамбли руских КУД з Горватскей – „Яким Гарди” з Петровцох, „Яким Ґовля” з Миклошевцох, КУД „Осиф Костелник” з Вуковару, КУД Руснацох Осиєк, Дружтва „Руснак” з Петровцох, та з Румуниї, Словацкей и з Подкарпатя (Закарпатя) у України. У програми зоз свою поезию участвовал и Славко Пап з Руского Керестура, а пре обставини з миґрантами и почежкосци на гранїцох з Горватску, дзепоєдни ансамбли з иножемства одказали участвованє.
