Отримани конститутивни ради орґанох рускей националней меншини

автор зам
930 Опатрене

ВУКОВАР – У Вуковаре вчера отримана конститутивна схадзка Ради рускей националней меншини Вуковарско-сримскей жупаниї, чийо члени вибрани на виберанкох за орґани културней самоуправи шицких националних меншинох у Горватскей 31. мая.

Як Рутенпрес дознава од Звонка Костелника, на конститутивней схадзки присуствовали 18 з 24-ерих членох новей Ради. За предсидателя Ради рускей националней меншини Вуковарско-сримскей жупаниї єдногласно вибрани Борис Бучко, а за подпредсидателя Йоаким Ерделї.

У Петровцох скорей отримана конститутивна схадзка Ради рускей националней меншини Општини Боґдановци, на хторей за предсидателя вибрани Владимир Дудаш, а вчера у Миклошевцох мала буц отримана конститутивна схадзка Ради рускей националней меншини Општини Томповци.

Одвитуюци державни орґани уж потвердзели вибор Агнетки Балатинац за Представителя Руснацох Осиєцко-бараньскей жупаниї и мр Иринея Мудрия за Представителя Руснацох Городу Заґреб, а тих дньох ма буц потвердзене и конституованє горе спомнутих руских радох.

Як гварел Костелник, по 10. юлий би мала буц конституована и нова Координация рускей националней меншини у Горватскей, у хторей представителє општинских, жупанийских и городских радох, односно Представителє Руснацох.

 

ПОВЯЗАНИ ТЕКСТИ