План – буц у висшей лиґи

автор С. Барань 1. фебруар 2016

Одпочивок медзи єшеньску и ярню часц першенствених змаганьох дюрдьовски Фодбалски клуб „Бачка 1923” насампредз хаснує за пририхтованя за идуци змаганя. Тренинґи починаю 7. фебруара, а од бавячох ше очекує озбильносц ґу тей обовязки. Управа Клуба наявела укладаня до обєктох на стадиону за хтори им треба потримовка валалу, як и локалней самоуправи. Селекция ветеранох успишно бавела на турниру у Дєнови.

Гоч су од 2013. року у шестей лиґи представителє Бачкей гваря же пията лиґа цошка цо реалне у наиходзaцей сезони.

– Перши план нам же бизме вошли до висшей лиґи, а вец зме вельо того уж покончели. Тото нам идзе на руку, бо на початку сезони будземе домашнї, як госц нам приходзи ФК „Искра” з Коцура –  гварел Драґан Римски, секретар ФК „Бачкa”. Бачка на концу сезони остала друга у шестей лиґи на таблїчки Медзиопштинскей лиґи Вербас–Жабель–Титель, a по бодох ше виєдначела з Искру од котрей єдно змаганє страцели у прешлей сезони.

– У першим тиму маме добрих фодбалерох котри, нажаль, нє приходза поряднє на тренинґи. Од тей сезони, їх тренер Ґоран Андєлкович вимагал же би  поряднє вежбали и у терховнї. Дзекуюци спонзором з Дюрдьова котри им нє наплаца хаснованє їх терховнї, Рацова и Джaмбасова фамeлия годни тото и витвориц – гварел предсидатель Мирко Тривунович.

Тренинґи як и потераз буду штири раз до тижня, почню 7. фебруара, a теди будзе и Скупштина Клубу. Першенство почина остатнї тидзень у марцу. У Клубу функционую седем тими – ветеранє, сениоре, штири младши селекциї, од седем по шеснац роки и женски фодбалски тим, маю шейсц тренерох.

Backa Djenova            1 (1)

НЄОБХОДНИ ТРИБИНИ

Того року би любели поставиц трибини котри стадион нє ма, та патраче змаганя провадза на стояцо. Єден час були поставени трибини на конструкциї, алє вона препадла та ю склонєли. Нови трибини би  моглo поставиц, бо проєкт иснує уж три роки, а єст и  конкурси на котри би моглo конкуровац. Медзитим, пре нєришени маєтно-правни одношеня до того проєкта за тераз нє сцу инвестовац.

– Єдну парцелу фодбалски Клуб дзелї зоз Задруґу, алє ище вше нє ришени маєтно-правни одношеня после приватизациї валалскей Задруґи. Же бизме инвестовали треба нам їх согласносц котру ище вше нє маме. Задруґа би ше могла одрекнуц од тей часци парцели, алє то ище вше нїч нє ришене –  гварел Драґан Римски и потолковал же тот проблем иснує шеснац роки. Помоц ше глєдалo и од општини и од Месней заєднїци Дюрдьов, алє то ище вше нє ришенe.

Остатнї векши укладанє були у 2014. року кед адаптовали помоцни обєкт, купени семафор котри з векшей часци донация фарми „Медош” з валалу, поставени шейсц рефлектори на помоцним терену, почалo ше реновирац и адаптовац помоцни преблєкальнї и купелo мрежу за защиту за ґолoм котри буду поставени на початку ярнєй сезони. Каждого року ше дополнює и спортску опрему. У тим року би любели закончиц зоблєкальнї и поставиц векши простор за опрему.

Backa Djenova 3 (3)

ВЕТЕРАНЄ ПОБЕДЗЕЛИ НА ДВОХ ТУРНИРОХ У ДЄНОВИ

Ветеранє Фодбалского клуба „Бачка” ше штредком мешаца врацели зоз тродньовей нащиви Дєнови у Италиї дзе ше змагали на двох приятельских турнирох. Дюрдьовчанє мали чесц одпутовац до Италиї дзекуюци поволанки Милована Самарджича хтори по походзеню зоз Дюрдьова. До Дєнови одпутовали шеснацецерме ветеранє.

– Поволанка ше векшини ветераном попачела, так же зме такой почали кончиц коло орґанизциї. О мешац и пол конєчно зме, дзекуюци финансийней потримовки Општини Жабель, котра нам плацела драгу, и апатики „Ирис Фарма” зоз Шайкашу, котра нам виплацела змесценє у Дєнови, витворели задумку – гварел  Мирко Тривунович, предсидатель Управного одбору и ФК „Бачка”.

Перши дзень ше на вельким терену змагали зоз Фодбалским клубом „Еквадор” зоз Дєнови и победзели зоз 5:1. Други дзень у малим фодбалу тиж победзели екипу ветеранох рекреативцох зоз резултатом 10:8. У тей екипи бавел и Милован Самарджич. Вон орґанизовал обидва турнири и бул им домашнї, и з тей нагоди достал тренерку з амблемом Бачки за котру ше и вон дакеди змагал. После турнирох ше дружели з домашнїма и вихасновали нагоду же би нащивели велї интересантносци, медзи котрима и Тренинґ центер Сампдория, вельки стадион ФК „Дєнова” и друге. По одходу им явели же єст заинтересовани компаниї, у котрих робя людзе зоз Сербиї котри би их сцели на лєто вигосциц ознова на своїх турнирох.

– Мило нам же нас ознова волали. Будземе ше намагац же бизме ше и з нїма зишли, алє увидзиме чи у нїх, чи у нас. Тото будзе „диктовац” и финансийни можлївосци – гварел Стевица Шовлянски, подпредсидатель ФК „Бачка”.

Ветеранох ФК „Бачка” єст коло трицец, добре су орґанизовани и найвецей помагаю Клубу и його орґанизациї. Вони ше змагаю у лиґи ветеранох Нови Сад. 

Backa Djenova 3

ЧИ БУДЗЕ ПОТРИМОВКИ

– Людзе з валалу, як и Месна заєднїца Дюрдьов, би могли вецей помогнуц тому валалскому Клубу. Средства єст, поряднє их доставаме од општини и од спонзорох. Нїкому зме нє длужни, мамe основну опрему, алє же бизме напредовали треба и вецей укладац – гварел предсидател Мирко Тривунович. Єден од жридлох финанасованя то и орґанизация „Червено-билого” вечара, котри би и того року мал буц уж по штварти раз отримани у марцу. Стаємне жридло пенєжу Клуб ма и од обрабяня єдного ланца жеми хтори ше находзи обок при стадионє. До обробку укладаю симпатизере и члени Клуба, а заробок остава ФК „Бачка”.

(Опатрене 143 раз, нєшка 1)