Поволанка за „ТактФест 2015”

автор ядю 30. юлий 2015

Традиционалне акустично-композиторске змаганє „ТактФест 2015” будзе отримане од 28 до 30. авґуста у Новим Садзе, а циль Фестивала промоция авторскей акустичней музики младих виводзачох и музичних ґрупох. Прияви отворени до 21. авґуста.

Право участвовац на Фестивалу маю поєдинци и музични ґрупи, авторе музичних творох без огляду на ґеоґрафске походзенє учашнїка и жанр музики, а у складзе зоз правилами и етичним кодексом Фестивала. Учашнїк (самостойни виводзач) лєбо автор композициї (кед виводзач ґрупа) муши буц младши од 35 рокох.

На фестивалу мож участвовац зоз єдну авторску композицию хтора муши буц написана и виведзена на мацеринским язику (кед мацерински язик язик националней меншини, виводзенє композициї на тим язику ше окреме потримує, зоз прекладом композициї на сербски язик хтори треба же би ше придало жирию).

Композиция з хтору ше участвує на фестивалу нє шме буц афирмована, односно нє шме буц часц урядового виданя, анї нє шме буц у процесу видаваня по конєц Фестивала.

Окрем змагательней композициї учашнїки буду наступац з двома додатнима композициями звонка конкуренциї. Язик композициї хтору ше будзе виводзиц нє дефиновани зоз пропозициями.

Змагателє авторски композициї треба же би виведли на акустичней поставки инстриментох, без хаснованя ефектох лєбо додаткох хтори меняю основну фарбу инструмента.

На Фестивал ше мож приявиц особнє у кафеу „Перо” у Новим Садзе (Желєзнїцка 10), односно треба пополнїц формулар хтори мож найсц на: https://www.kulturanova.org/taktfest/prijava.php.

Зоз прияву, учашнїки треба же би придали и тексти писньох за шицки три композициї и преклади, кед ревиялни композициї нє по сербски. Тиж так, треба послац и звучни запис своєй роботи, було якого квалитета и формату. То нє муша буц композициї з хторима ше авторе приявюю за змаганє.

„ТактФест 2015” будзе отримани у кафеу „Перо” у Новим Садзе од 28. до 30. авґуста, а главна награда ваучер за купованє музичней опреми у тогорочного главного спонзора – Музичней хижи „Стринґер”. Шицки виводзаче достаню и музични записи композицийох хтори виведли.

Други информациї мож достац на урядовим боку https://www.kulturanova.org/taktfest/index.php лєбо на телефон 062 547 558 (Слободан Качански), 064 181 45 39 (Милан Врачар) и прейґ мейла info@kulturanova.org.

(Опатрене 98 раз, нєшка 1)