Подзекованє НВУ „Руске слово”

автор  Аґенциї/„Рутенпрес”/дописователє 28. фебруар 2016

З нагоди Медзинародного дня мацеринского язика Канцелария за людски и меншински права внєдзелю орґанизовала културно-уметнїцку програму.

На програми у Беоґрадзе присуствовали представителє националних совитох националнох меншинох, державних орґанох, институцийох, нєзависних целох, та дзеци – представителє националних меншинох, котри рецитовали на мацеринским язику. На програми участвовали и представителє Руснацох.

Право на информованє на язикох националних меншинох ше витворює на 15 язикох, а значне же би ше мацерински язик пестовало у медийох, визначела Директорка Канцелариї Сузана Паунович и додала же Влада озбильно роби же би унапредзела и защицела меншински язики.

Вона поведла же постояци медиї треба ище баржей потримац, односно оможлївиц им капацитет у людстве и финансийох, и же нєт потреби обавац ше же медиї хтори информую на язикох националних меншинох буду под знаком питаня.

У Сербиї нєшка єст вецей як 30 етнїчни заєднїци, шицки бешедую на своїм язику, а 2006. року, кед Сербия ратификовала Европску грамоту о реґионалних и меншинских язикох, превжали зме обовязку защициц 10 меншински язики – гварела Пауновичова и визначела податок же у 42-ох локалних самоуправох 11 язики маю статус службеного.

У Сербиї вецей як 72 000 дзеци цалу наставу слухаю на мацеринским язику, а вецей як 7 000 дзеци маю предмет мацерински язик з елементами националней култури. Dzenj-05

ЛЄГЧЕЙШЕ ДО РУСКЕЙ ТАСТАТУРИ

У мено нашого Националного совиту (НС) присуствовали членїца Совиту и предсидателька його одбору за образованє Мелания Римар, членїца НС и директорка керестурскей Школи „Петро Кузмяк” Хелена Пашо Павлович, директорка НВУ „Руске слово” Мартица Тамаш и школярка 5. класи керестурскей Школи Минеа Югас, котра облєчена у руским народним облєчиве рецитовала по руски.

На програми и Дзецински хор „Чародїйство („Чаролија”) шпивал препознатлїви, народни шпиванки на язикох националних меншинох. На концу програми Директорка Канцелариї Сузана Паунович додзелєла подзекованя за медийне доприношенє у промовованю людских и меншинских правох представительом 41-го медию, а 13 медиї достали подзекованє за провадзенє и информованє о роботи националних совитох у 2015. року. Медзи добитнїками и тижньово новини „Руске слово”.

Dzenj-06– Нашо медиї – тижньово новини „Руске слово”, часописи „Заградка” и МАК, як и аґенция „Рутенпрес” информую на нашим, руским мацеринским язику, зоз чим чуваю руски язик и културу, националну свидомосц и идентитет Руснацох. Подзекованє, медзи иншим, гутори и же нашо информованє о рускей националней заєднїци, о Националним совиту и його одборох припознате, же добре робиме и же зме на хасен и рускей националней заєднїци и нашей держави Сербиї – гварела директорка НВУ „Руске слово” Мартица Тамаш.

Пре виражену заинтересованосц припаднїкох рускей заєднїци, Национални совит Руснацох тих дньох на свой сайт положел и способ намесцаня тастатури и фонтох на нашим язику на рахункари.

На правим боку сайту НС – www.rusini.rs – под меном „Руска тастатура”, а з кликом на „Руска тастатура и єй инсталация”, дате толкованє єй инсталованя. НС Руснацох ше и з тим поцагом уключел до означованя Медзинародного дня мацеринского язика.

ПРОГРАМА И У ШИДЗЕ

Внєдзелю у Шидзе у орґанизациї Совиту за национални меншини и Униї женох ОО Сербскей напредней странки тиж бул означени Медзинародни дзень мацеринского язика з пригодну програму под назву „Люб свойо, почитуй цудзе”, хтора отримана у сали Културно-образовного центра.

У шидскей општини у урядовим хаснованю руски и словацки язик, а у валалох Батровци и Сот у урядовим хаснованю горватски язик и писмо.

Замерковани наступ мали того вечара и Руснаци з КПД „Дюра Киш”. Миломир Шайтош, заменїк предсидателя Рускей матки, член Националного совиту Руснацох и член Шветового конґресу РРЛ кратко поинформовал присутних о рускей националней заєднїци и руским язику. Руску шпиванку з тей нагоди представела Мишана шпивацка ґрупа, а професор мацеринского язика Зденко Лазор пречитал за тоту нагоду пригодни стихи.

(Опатрене 111 раз, нєшка 1)