Покраїнска влада вимага понїщованє препорученя о узурпациї державней жеми

автор ртв/зам
980 Опатрене

НОВИ САД – Покраїнска влада поволала вчера Владу Сербиї же би положела звонка моци заключенє од 11. марца того року у хторим локалним самоуправом препоручене же би ше узурпатором державней польопривредней жеми дошлєбодзело по 1. май приявиц свою узурпацию и з нїма заключиц звонкасудске поровнанє, зоз штредню цену за бранє жеми под аренду на териториї Войводини.

У сообщеню видатим по вчерайшей схадзки Покраїнскей влади наведзене же ше з тим препорученьом Влади Сербиї „стимулує нєзаконїте заберанє польопривредней жеми, место же би ше инсистовало на поступку и условийох хтори предписани зоз Законом о пльопривредней жеми”.

У вчера прилапених заключеньох на схадзки Покраїнскей влади з нагоди пробованя леґализованя нєзаконїтого хаснованя державней польопривредней жеми у АП Войводини, предсидательох општинох и городоначальнїкох у Войводини ше поволує же би, водзаци рахунку о законїтосци, нє прилапели спорни препорученя Влади Сербиї. Предложени заключеня буду послати Скупштини АП Войводини на розпатранє и прилапйованє.

Источашнє, Покраїнска влада поволує и Министерство польопривреди и защити животного штредку же би информовало явносц о тим хто узурпаторе польопривредней жеми у державней власносци на териториї Городу Зомбор и же би ше процив нїх превжало законски мири.

У предложених заключеньох Покраїнска влада поволує спомнуте министерство же би благочасово запровадзело шицки зоз законом предписани активносци у даваню державней жеми под аренду, як и же би, без одкладаня, приступело ґу вирабяню нового Закона о польопривредней жеми.

ПОВЯЗАНИ ТЕКСТИ