Польодїлци у Дюрдьове нє кармя статок, алє любимцох

автор бас 24. април 2016

Михал Салаґ уж трицец роки продукує и предава житарки у своїм валалє и на Найлон-пияцу у Новим Садзе, найвецей кукурицу и житарки за дробни животинї и домашнїх любимцох. Тренд таки же цени вше нєстабилнєйши, укладаня вше векши, а зарабок вше менши.

После завераня фирми дзе робел як тарґовец, Дюрдьовчань Михал Салаґ, Мишко, як го у Новим Садзе волаю, почал обарбяц жем и продуковац кукурицу, ярец, овес, жито, кукурицу за пуканє, слунечнїк за кусанє и мишанїну житаркох.

Основни приходи му зоз польопривреди, та ше одлучел шицко цо продукує предавац на менше, з дому и на Найлон-пияцу, такволаним Рондьошу у Новим Садзе, вше на истим месце, каждей нєдзелї уж вецей як трицец роки.

Медзитим, тренд таки же ше у варошу житарки на меранє вше менєй купує, окреме од 2001. року, од кеди ше почало розвивац гипермаркети у котрих мож купиц шицко цо и нашо польопривреднїки продукую.

– Од тих часох Новосадянє баржей купую у гипермаркетох, дзе цени часто нїзши, та шицки продукователє на найлону, як и я, же бизме затримали муштерию, мушиме зменшац цену – гварел Салаґ, котри як тарґовец з вецейдеценийним искуством свидоми же муштерия муши буц задовольна.

– Добри тарґовац муши добре вимерац чежину продукта, муши буц приємни и крашнє потолковац шицко цо ше муштерия опита. Мнє то нє чежко, бо знам же то так треба – совитує Михал. Же би бул препознатлїви док предава на Найлону, вше ноши брушлїк крем фарби и чарни качкет. А же би бул конкурентни, муши буц и иновативни, та часто ослухує котри продукти популарни при Новосадянох. О трендох ше информує у польопривредних часописох и тв-емисийох, алє найчастейше у бешеди з людзми. Гвари же би любел продуковац и просо, мугар и швитле нашенє, алє ище вше нє нашол хто му витлачи.

Заш лєм, на валалє вецей предава як у варошу. Найчастейше кукурицу на мех од 50 кили и з яри кед почна кармeнє курчатох и швиньох. У тей своєй роботи вон обачел тренд же ше вше менєй карми домашнї животинї и же ше валалчанє вше частейше одлучую у предавальнї купиц продукти з меса, як сами продуковац.

У Новим Садзе найчастейше предава жито, кукурицу, ярец и мишанїни на мещки од 5 або 10 кили, а варощанє купую и по 200 ґрами житарки за голуби и цукровки.

– Прешлого року сом посадзел обични слунечнїк „улярац”, алє слабо ше го предавало, як и други житарки. Того року плануєм посадзиц слунечнїк за кусанє „ґрицко”, и наздавам же го лєпше предам. Предаванє житаркох наисце права коцка, бо ше нїґда нє зна яки буду цени – наглашел Салаґ.

Свидоми же гражданє з варошу любя домашнї продукти и же вше частейше купую лєм продукти од виталней значносци, на Найлон почал ношиц и вайца од кури, гуски и качки, та ше наздава же так вецей и зароби.

najava ekonomija Mihal Salag

(Опатрене 156 раз, нєшка 1)