Посадзени вецей як 600 древка

автор а. медєши
559 Опатрене

РУСКИ КЕРЕСТУР – Всоботу, 21. новембра, у Керестуре отримана акция садзеня древкох у хторей посадзени вецей як 600 древка на вецей локацийох.

Найвецей древка, прейґ 450, засадзене до лєшику, потим 80 древка лоло Озерка и исто тельо на драги спрам Водици, а коло 50 древка засадзени у центру валала – у парку, коло Дома здравя, опрез школского будинку Замок, Спортскей гали, Старецкого и Огньогасного дому и индзей.

Главни орґанизатор тей акциї була Месна заєднїца, хтора найвекше число древкох достала од Каритасу зоз Нового Саду прейґ Анити Ґовльовей, а у ожелєньованю Керестура помогло и Явне комуналне подприємство Руском, Добродзечне огньогасне дружтво Руски Керестур, члени Церковного одбору, Здруженє спортских рибарох Коляк, члени ФК Русин, школяре Школи Петро Кузмяк, члени Дома култури и Месного одбору Сербскей напредней странки. У акциї участвовали и фирми Рен доо и Вортекс колор хтори и донирал єдну часц саднїцох.

Окончователь длужносци секретара Месней заєднїци Михайло Пашо з тей нагоди подзековал шицким хтори участвовали у акциї садзеня древкох и наявел же подобна, алє векша акция, будзе орґанизована и нарок, у хторей заплановане посадзиц коло 3.000 древка.

ПОВЯЗАНИ ТЕКСТИ