Посадзени 800 млади древка

автор люр 2. децембер 2016

Дружтво за бриґу о желєних поверхносцох ,,Еко ґерила’’ зоз Нового Орахова, всоботу, организовало акцию садзеня младих древкох. Гоч ше того року на акцию позберало менєй младих як прешлих рокох, тото цо заплановане то и поробене – засадзени 800 младнїки ореха, сибирского дубу, дубу и явору.

Понеже дружтво активно роби уж вецей роки, того уж єдну часц младнїкох обезбечели зоз свойого розсаднїку, док остаток обезбечел „Еко дуб” зоз Криваї. Древка ше садзело коло драги котра водзи ґу Ґунарошу.

Акцию помогли Дружтво за спорт и младеж и Месна заєднїца Нового Орахова. Борис Бесерминї, предсидатель Дружтва за спорт и младеж, и главни орґанизатор акциї, барз задовольни зоз роботу котра всоботу поробена.

– Уж даскельо роки каждей єшенї посадзиме даскельо стотки млади древка. Векше число древкох зажиє, и мило ми попатриц на древа котри маю уж по даскельо роки, а ми их садзели. Єдна менша час древкох ше нє приме, а нажаль, надосц младнїки ше поґажи и поламе. Но, то углавним у хотаре. Правда, случовало ше же дахто уж ютредзень повицагує древка и однєше их, но, то нам анї нє так жаль – озда их засадзи на другим месце.

На концу, треба наглашиц же Месна заєднїца прейґ плакатох модлї гражданох же би нє знїщовали младнїки, а кед ше за дакого утвердзи, же ґажел по желєних поверхносцох, процив нього ше превежнє одредзени законски мири.

(Опатрене 83 раз, нєшка 1)