РУСКИ КЕРЕСТУР – Здруженє женох „Байка“ вчера у Руским Керестуре представело резултат проєкту „Зачувайме традицию”, у рамикох хторого жени ушили штири женски народни облєчива за роботу.
Предсидателька Здруженя Славица Катона гварела же у тей роботи були анґажовани штири жени, а сам процес бул зложени и тирвал коло мешац.
– „Байка” ше нєпреривно намага здогаднуц людзох на нашу традицию, а з тим проєктом зме указали як нашо жени були пооблєкани у роботи по обисцу и на полю, и мило нам же людзе пришли на нашу скромну презентацию – гварела Катонова.
З тим представяньом „Байка“ финализовала проєкт „Зачувайме традицию”, за хтори од Покраїнского секретарияту за привреду достала 120 000 динари. Окрем до виробку облєчива, часц пенєжу уложена до набавки нових кроснох.
На програми представяня облєчива участвовали и млади ґимназиялци, котри присутним одшпивали даскельо руски шпиванки, а жени з „Байки” за госцох пририхтали и закуску.
