НОВЕ ОРАХОВО – У Новим Орахове Националне швето Руснацох преславене вчера з програму хтора у Руским доме почала на 19,30 годзин з привитнима словами предсидателя КУД „Петро Кузмяк” Михайла Еделинския, а Ораховчаном швето повинчовал и предсидатель Вивершного одбору Националного совиту (НС) Руснацох Желько Ковач, з обецунку же ше НС будзе старац о каждому Руснакови у Сербиї.

После привитних словох члени КУД „Петро Кузмяк Владимир Маґоч и Женска шпивацка ґрупа одшпивали шветочну шпиванку Руснацох у Сербиї, а провадзел их тамбурови оркестер Дружтва.

Наймладши члени КУД ше представели з рецитациями, а потим и старши,  котри присутних през рецитал здогадли на руску историю, звичаї, народни скарб, а зоз стихами руских писательох и на богату руску творчосц.

Рецитал бул преткани з нїтками руских шпиванкох у виводзеню тамбурового оркестру Дружтва и Женскей шпивацкей ґрупи, як и солисту Владимира Маґоча. Програма  закончена з „Многая лїта”, цо одшпивали шицки присутни Руснаци.

После програми отримани коктел, а на означованю нашого швета присуствовали и предсидатель Совиту Месней заєднїци Нове Орахово Золтан Фаркаш, представителє цивилних здруженьох з Орахова, Руснаци з Бачкей Тополї и Орахова, як и други приятелє и почитователє Руснацох.