Приповедки „живих кнїжкох”

автор апа 10. децембер 2014

НОВИ САД – Вчера у ЦК13 у Новим Садзе отримана перша „Жива библиотека”, на хторей участвовали людзе як „живи кнїжки”, медзи котрима бул и Иван Канюх з Нового Саду.

За орґанизацию була задлужена нєформална ґрупа младих у рамикох програми „Локомотива”, хтору потримує Управа за спорт и младеж Городу Нови Сад. Медзи орґанизаторами були и Соня и Ана Гудаково з Нового Саду, а як волонтерки помагали Яна Еделински и Мартина Гудак з Руского Керестура.

Учашнїки, з векшей часци млади особи порихтани подзелїц свойо животни приповедки, представяли 14 „живи кнїжки”. Нащивителє могли „закупиц” кнїжку по жаданю и мац 30 минути з вибрану особу-кнїжку и питац ше шицко цо жадаю знац о тей особи.

Було рижни „живи кнїжки” – „Атеисткиня”, „Особа котра роби з людзми з Дауновим синдромом”, „Особа з инвалидитетом”, „Горват з Войводини”, „Веґан” и други, а Иван Канюх бул „Кнїжка Руснак”.

Медзи найчитаншима кнїжками були „Бувши наркоман”, „Ґей” и „ХИВ позитивна особа”, а „Руснак” мал 6 „читачох”.

Збуванє орґанизоване з тему „Войсц до цудзих ципелох”, з намиру приказац и розумиц иншаке, а орґанизаторе, учашнїки и нащивителє ше зложели же воно було нє лєм интересантне, алє и барз успишне.

(Опатрене 226 раз, нєшка 1)