Програма яка планована у юнию

автор зам
1.2k Опатрене

Як познате, пре оправдани причини термин тогорочного 55. Фестивалу рускей култури „Червена ружа” з конца юния преложени на початок октобра и „Ружа” будзе отримана у Спортскей гали у Руским Керестуре, а найважнєйше же шицки програмни змисти плановани у юнию буду и отримани.

Шицки учашнїки на манифестацийох „Червеней ружи” хтори були плановани за єй перши, юнийски термин, свойо участвованє потвердзели и за други термин: – 1. и 2. октобра, гварел за „Руске слово” о. д. директора Дому култури Руски Керестур Йоаким Рац, так же, окрем Естрадного концерту, будзе вистава подобових роботох Андєлки Античевич з Беркасова, манифестация „Червене пупче”, „Одгуки з ровнїни”, змаганє за найкрасши глас з ревиялним концертом и Шветочни концерт. Перши три спомнути буду на соботу, 1.,  а други два на нєдзелю, 2. октобра.

– Понеже тото найважнєйше – програма, знова утвердзена, а мушим повесц же шицки нашо КУД-и з похопеньом прилапели нови термин и участвованє на „Ружи”, тераз ше баржей пошвециме технїчному боку Фестивалу, бо будзе у новим просторе, дзе є потераз ище нє отримовани – у Спортскей гали. За тото зме концом юния оформели и окремну Технїчну комисию, хтора спарти шицки условия и можлївосци, насампредз вязани за озвученє, ошвиценє и намесцанє сцени, карсцельох…

Мушим повесц и же пред першим термином особи котра нам тото обезпечує теди виплацени 350 000  динари, та будземе видзиц як тото тераз прилагодзиме новому простору. Рахуєм же то будзе без дополнююцих, лєбо з минималнима средствами, тиж з порозуменьом ситуациї у якей зме ше нашли, та би нє требало буц даяки окремни проблеми – гварел Йоаким Рац, визначуюци же тих дньох подписани и анекси контрактох за средства хтори „Ружи” обезпечую Република и Покраїна, так же и тот сеґмент за Фестивал у новим терминє будзе обезпечени.

ПОВЯЗАНИ ТЕКСТИ