Промоция потиского винарства

автор С. Барань 18. децембер 2015

Манифестация „Нови вина Потися” презентовала домашнї вина трицец самостойних продуковательох зоз подруча рики Тиси, а бешедоване и о сортох котра би була найлєпши у тим краю, як и обераню грозна и чуваню вина.

Туристична орґанизация Општини Жабель прешлого пиятку у ресторану „Наша ловарска приповедка” у Жаблю орґанизовала Манифестацию „Нови вина Потися”. Єй циль и далєй презентация домашнїх винох котри продуковани у подручу коло рики Тиси.

У рамикох манифестациї була деґустация рижних файтох вина вецей як трицец самостойних продуковательох вина, винских здруженьох и винарийох зоз скоро шицких општинох потиского реґиону – з Чуроґу, Темерину, Молу, Бачкого Ярку, Сримских Карловцох, Апатину, Зомбора, Ириґу, Зомбору, Ковилю, як и других местох.

Едукативна часц менифестациї и того року прицагла увагу числених продуковательох вина. Енолоґ Йован Попов, бешедовал о сортох вина котри ше пестую у подручу у Потися и тогорочним обераню вина, док енолоґ и сомелиєр Любица Радан бешедовала о блїзкей вязи поживи и вина.

Попри нїх двоїх, у комисиї за оценьованє найлєпших винох була и енолоґ Мира Попов. Од 36 прикладнїкох, вибрани найлєпши три перши места у трох катеґорийох, найлєпши били, червени и чарни вина. Перше место за биле и червене вино достали Чуружанє „Кум МП”, перше место за червене вино подзелєли Драґица Драґин зоз Чуроґу и Золтан Бохоцки зоз Темерину.

Же би вино баржей смаковало, у єдней часци сали шицки мали нагоду коштовац домашнї сири, бомбони и колачи, а за памятку дому однєсц сувенир.

Присутних привитали Чедомир Божич, предсидатель Општини Жабель и Мария Чупич директорка ТОО Жабель. Манифестацию потримали Министерство тарґовини, туризма и телекомуникациї и Општина Жабель.

(Опатрене 97 раз, нєшка 1)