Рекреация за здрави живот

автор Т. Худак 12. децембер 2015

Попри вецей файтох рекреативних спортских активносцох за дзеци и за хлопох, у Коцуре ше и жени уж роками можу рекреировац дзекуюци годзином аеробику, хтори ше отримує два раз тижньово у физкултурней сали коцурскей Основней школи. Аеробик од початку водзи Даница Влахович зоз Вербасу, лєбо як ю жени знаю, Дана.

Як толкує Дана, аеробик ше у Коцуре у континуитету отримує ещи од 1999. року, з тим же ше го на початку  отримовало у сали Каритасу, хтора  познєйше була мала.

– Здогадуєм ше же зме теди обявели же у Коцуре почнєме зоз годзинами аеробику, и зволали зме жени най приду того вечара до Каритасу. Вони думали же приходза лєм на догварку, алє я вжала зоз собу музику, и опрему, и такой сом им сцела указац же цо то будземе робиц на годзинох. Вони шицки прилапели, так же уж тот перши вечар бул продуктивни – здогадує ше Дана.

32 DanicaОд теди та по тераз, у вшелїяких условийох, аеробик исновал по нєшка. Дана толкує же, з оглядом же вельо роки прешло, нє може повесц же ходза исти жени як и того першого вечара, алє и тераз єст дас 10 жени хтори єден длуги час вирни тей файти рекреациї. Роки за таку рекреацию нє важни, бо на аеробик приходза и дзивчата од 14,  и жени од 60 роки, а сама Дана уж у седмей децениї живота, и зоз своїм прикладом указує же физична активносц наисце барз важна за чловеково здравє.

За годзину и пол, кельо тирва тренинґ Дана зоз женами пороби вежби за цале цело, як гвари, од верху глави по мали палєц на ноги.

– През вежби активуєме шицки мускули на целу, а док им указуєм вежби, я им вше толкуєм же як ше треба здраво костирац, бешедуєм им же цо най поєдза лєбо попию после аеробику, же кельо рекреация важня за їх здравє – гвари Дана.

Попри тим, Дана на годзинох  одшмелює и мотивує жени же би були витирвали же би правилно и до конца поробели сериї даєдних вежбох хтори знаю буц окреме чежки. Жени, хторих на годзинох аеробику вше єст коло двацец, прешвечени же им така файта рекреациї одвитує, и толкую же ходза на годзини праве пре здравє, добру кондицию, даєдна придзе и же би отримала красни физични випатрунок, и шицки ше складаю же ше после аеробику чувствую барз добре.

Годзини аеробику ше у физкултурней сали отримує пондзелок и стреду, починаю на 20 годзин, а єден термин кошта 130 динари.

(Опатрене 137 раз, нєшка 1)