РЕМЕСЕЛНЇКИ ЗОЗ РУСКОГО КЕРЕСТУРА НАЩИВЕЛИ ШИД

автор влдї 28. май 2016

Ремеселнїки зоз Здруженя ремеселнїкох з Руского Керестура зоз членами фамелийох, штредком мая були на єднодньовим вилєту у Шидзе и госци церкви и парохиї Преображеня Господнього. До Шиду орґанизовано припутовали на автобусу, а препреченя того дня нє було анї пре нєвигодну хвилю, анї пре административни формалносци на гранїцох медзи Сербию и Горватску.

У мено домашнїх их привитал парох шидски о. Михайло Режак и упознал зоз историю Лєтнєй владическей резиденциї, у хторей велї були першираз. Вон здогаднул и на потерашню обнову будинка, хтора почала ище под час бувшого пароха о. Михайла Малацка.

– У Резиденциї єст рижни активносци и просториї – маме пиньвицу з вином, през рок маме подобни нащиви як цо тота зоз Керестура, ту нам и општинска дзецинска заградка, як и просториї за дзеци з окремнима потребами. Барз нам мило же маме госцох з наших местох, бо треба же бизме ше стретали – гварел о. Михайло.

На красних словох привиту подзековал Владимир Емейди, предсидатель Здруженя ремеселнїкох. У мено домашнїх Звонко Гнатко, предсидатель Вивершного одбору доо „Руски двор”, упознал госцох зоз витвореньом идеї коло снованя винїци на церковним маєтку, хтору прилапели 46 акционере зоз наших местох, хтори подзвигли винїцу, а вец почали и продукцию вина.

Владимир Емейди нам гварел же уж длугши иснує идея же би ше пришло нащивиц Шид и же ше то конєчно витворело.

– Стретаме ше на културних и вирских подїйох, а тото конкретни крочай же бизме ше лєпше упознали и преглїбели вязи, у култури, духовносоци, алє и у поднїмательстве и туризме. Прияти зме з полним шерцом и шицки ноша вельо упечатки зоз тей нащиви – констатовал Владимир Емейди.

Понеже ше у Шидзе каждого 15. у мешацу отримує традицийни и на далєко познати вашар, госци з Керестура вихасновали нагоду пойсц на вашар, опатриц цо єст, та дацо и купиц. Тиж им парох о. Михайло Режак указал будинок Резиденциї од пиньвици по пойд, а окрем смачного полудзенку з традицийним сримским паприґашом, госци вєдно з домашнїма и зашпивали.

На гармоники их провадзел Славко Загорянски, член Церковного одбору домашнїх. Зоз писню и жаданями же би ше ознова стретли, у пополадньових годзинох ше домашнї одпитали од госцох.

УШОРЕНЄ РЕЗИДЕНЦИЇ

Роботи єст ище надосц, а єдна зоз значнєйших хтора будзе того року, то же би ше до будинку инсталовало централне зогриванє, ушорело ище дзепоєни хижи на поверху и пойд, хтори би зоз змесценями за спанє бул єдна файта хостелу.

По словох о. Режака, тераз єст 30 места за ноцованє, з тим же число посцельох будзе значно звекшане.

НЄ ВИТВОРЕНИ ШИЦКИ ЗАДУМКИ

Було плановане же госци з Руского Керестура нащивя и винїцу доо „Руски двор” на Бановини, медзитим, пре подлу хвилю и скрацени час пре затримованє на гранїци, то ше нє удало. Тиж ше нє витворело анї нащиву поднїмательом у Бикичу, дзе госци мали нащивиц погон за жимне цадзенє олєю Юлияна Ковача и овоцнїк Звонка Гнатка зоз Шиду. Юлиян Ковач свойо продукти и продукцию накратко представел у Шидзе у будинку Резиденциї.

(Опатрене 120 раз, нєшка 1)