Рестаурована Хресна драга на римокатолїцким теметове

автор ол. русковски
568 Опатрене

КОЦУР – Того тижня закончени роботи на рестаурованю Хресней драги котра ше находзи на коцурским римокатолїцким теметове.

Коло драги на уходзе до теметова находза ше каплїчки у котрих змесцени фиґури з котрима представене Исусово церпенє, ношенє крижу, паданє под нїм, розпинанє и умеранє на крижу.

Рестаурованє фиґурох зробели Силвестер Макаї и його син Ромко. Як гварел Силвестер, то була вичерпна и озбильна робота котра тирвала три мешаци.

– Хресна драга на римокатолїцки теметов поставена 1912. року и цали єден вик витримала. Алє, тераз уж наисце велї фиґури були и очкодовани, и порозбивани, та нас Церковни одбор римокатолїцкей церкви у Коцуре анґажовал же бизме их пошорели, подоправяли тото цо хиби и офарбели. Нам чесц було зробиц тоту роботу – гварел Силвестер.

Рестауровани фиґури врацени до каплїчкох и заварти зоз склом. Скло, як и роботу за тоту нагоду, обезпечел Мирослав Медєши зоз Коцура и його подприємство ,,Скло рамик”.

ПОВЯЗАНИ ТЕКСТИ