Руснаци зме – то треба повесц и на Попису

автор ол. русковски
124 Опатрене

ВЕРБАС – З нагоди наиходзацого Попису жительства и маєтку, хтори ма буц од 1. по 31. октобер, члени Националного совиту рускей националней меншини Стеван Самочета з Коцура и Мартица Тамаш з Вербасу бешедовали о наиходзацим Попису на трибини у  Културно-просвитним дружтве „Карпати” у Вербаше.

Отвераюци трибину предсидатель КПД „Карпати” Микола Папуґа гварел же члени того дружтва свидоми же барз важне же бизме и у наиходзацих рокох и децениї, по гевтот шлїдуюци попис та и далєй, очували свой национални идентитет и свойо права и насампредз число припаднїкох нашей националней заєднїци.

Нам, Руснацом, барз важне же би ше кажди припаднїк нашей националней заєднїци вияшнєл же є Руснак, же наш язик руски и же зме по вири грекокатолїки, гварела Тамашова, хтора и член Општинскей пописней комисиї у Вербаше.

Тамашова гварела же остатнїх дньох у медийох присутна информация же ше гражданє нє муша вияшньовац о националней припадносци, своїм язику и своєй вири, алє же нам барз важне же бизме ше вияшнєли же зме Руснаци, бо од того буду завишиц проєкциї будуцих буджетох за обласцох хтори у компетенциї Националного совиту и хтори важни за очуванє нашого националного идентитету, а то култура, образованє, информованє и службене хаснованє язика и писма.

Член Националного совиту Стеван Самочета, хтори и инструктор за едукацию и провадзенє и контролу роботи єдного числа пописовачох у Општини Вербас, гварел же пописоваче буду мац службени леґитимациї, же податки буду уношиц до апликацийох на лаптопох и же за пописованє податкох у єдним обисцу будзе требац коло пол годзини.

Самочета гварел и же у Попису у Општини Вербас будзе участвовац  и красне число Руснацох. У Коцуре од Руснацох буду робиц осмеро пописоваче и двойо резервни пописоваче, а у Вербаше буду робиц штверо Руснаци як пописоваче.

Вон визнчел же при пописованю членох фамелиї треба начишлїц и тих хтори одсутни, на приклад, тих цо робя у иножемстве, або су нє дома, бо ше индзей школую, же би нїхто нє бул вихабени.

Шицки присутни на трибини заключели же треба же бизме ше шмело вияшнєли же зме Руснаци, грекокатолїки и же наш язик руски.

По члену 47 Устава Републики Сербиї ґарантує ше полну шлєбода виражованя националней припадносци, алє по тим члену ше граждан нє муши вияшнїц о своєй националней припадносци.

ПОВЯЗАНИ ТЕКСТИ