ЧАЧАК – Всоботу, 12. октобра, Карате клуб „Гайдук” наступел на Першенстве Сербиї за кадетох и юниорох у Чачку у орґанизациї Карате федерациї Сербиї.
Каратисти у поєдинєчних борбох освоєли два стрибла и єдну бронзу, а екипно єдну бронзу.
У екипним змаганю участвовала и Сара Планчакова зоз Руского Керестура, хтора тренира у спомнутим клубу, а хтора наступела у составе зоз Наталию Сератличову (капитен), Кристину Соколовски и Нину Воїновичову. Тота юниорска женска екипа, после даскелїх рокох, освоєла треце место и бронзову медалю у тей катеґориї.
У поєдинєчней конкуренциї визначели ше Александра Дїкич и Наталия Сератлич хтори освоєли други места и стриберни медалї, як и Лука Ґириц хтори освоєл треце место и бронзову медалю.
Учашнїки очиглядно у добрей форми понеже после освоєних медальох на Першенству Войводини хторе отримане початком октобра у Новим Бечею, предлужели шоровац успихи и на Першенству Сербиї.
