Светлана Бойчук нова предсидателька

454 Опатрене

У рамикох 17. Шветового конґресу Русинох/Руснацох/Лемкох пияток, 18. авґуста, на Филозофским факултету отримани и 11. Шветови форум младих Русинох/Руснацох/Лемкох. На Форуму млади зоз Словацкей, Горватскей, Польскей, Румуниї, Сербиї и України представели свою дотерашню роботу, плани, активносци, як и проблеми зоз хторима ше млади зочую у їх заєднїцох у своїх державох.

После отвераня делеґати зоз спомнутих жемох представели роботу младих у своїх державох у периодзе од 2021. по 2023. рок, а потим ушлїдзело виберанє нових представительох Форуму младих зоз каждей держави. За Румунию вибрана Светлана Бойчук, Польску будзе представяц Клаудия Новак, Сербию Катарина Фейди, Републику Горватску Матей Бурчак, Републику Словацку Матуш Допиряк. Меновани представителє мали задаток медзи собу вибрац и нового предсидателя Шветого Форуму младих РРЛ.

Делеґати єдногласно вигласали же Светлана Бойчук зоз Румуниї будзе предсидателька идуци два роки. Вона визначела же ше за початок будзе намагац позберац шицки контакти нововибраних представительох и їх сотруднїкох же би цо скорей почали робиц. За єй заменїка и подпредсидателя Шветового Форуму младих вибрани Матуш Допиряк зоз Републики Словацкей хтори визначел же найвекши циль упознац ше зоз ситуациями у шицких державох хтори участвую у тим Форуму. Тото цо Матуш визначел як найвекши проблем младих у Словацкей то асимилация, а дума же и у других державох така ситуациї, и то єдна зоз причинох прецо важни Шветови Форум РРЛ на хторим мож на даяки способ дойсц до ришеня того проблема. 

Матей Бурчак зоз Републики Горватскей на Шветовим Форуму младих представел роботу Културно-просвитного дружтва „Руснак” зоз Петровцох.

– У Горватскей найвекши успих хтори нам ше удало направиц то же зме зачували оркестер и шпивацку ґрупу младих и же почала робиц и дзецинска шпивацко-танєчна ґрупа за дзеци предшколского и школского возросту. Як и вшадзи, младих барз чежко прицагнуц на танєц, на шпиванє, цо вшадзи проблем, та и у нас. Тоти хтори научени одмалючка, вони сцу и надалєй буц часц нашей културней творчосци. З другого боку, гевти други ше двоя же цо и як, алє самостойно ше нє трудза учиц руски язик – гутори Матей.

Активносци младих у Сербиї тогорочним форуму представел Томислав Пап зоз Нового Саду.

– На Форуму сом бешедовал о подїйох у нашей Матки, односно о случованьох у Руским културним центре. Гоч мушим дакус критиковац Матку же вецей нє так як цо скорей було, думам на вецей збуваня, алє и ширши збуваня дзе ше робело за Руснацох, а нє правело нїч же би ше позберало дацо од Руснацох. Окрем того, єст вельо активносци коло церкви, єст виронаука за младих. Можем повесц же наш новосадски паркох барз доступни, ма порозуменя и дзеку побешедовац зоз младима на рижни теми.

Томислав Пап

Млади после представяньох роботи у своїх жемох и вибераня  предсидателя предлужели бешедовац о планох, активносцох и роботи у наиходзацих двох рокох.

После урядовей часци Форуму, млади обишли културни и вирски обєкти у Новим Садзе, Коцуре и Руским Керестуре.

Идуци Шветови Форум младих РРЛ требал би буц отримани у Румуниї, у рамикох Конґреса, по теди шицки млади делаґати Форуму ше буду намагац у своїх жемох направиц ище лєпши резултати.

ПОВЯЗАНИ ТЕКСТИ