Сиґурни крочай по ценким ляду

автор иван сабадош 21. новембер 2016

Конєчно конституовани Пододбор за демоґрафию, цело Националного совиту Руснацох хторе формално и орґанизацийно часц Одбору за службене хаснованє язика и писма, а у пракси ма задаток координовац шицки институциї и активносци унапрямени на очуванє численосци рускей заєднїци у Републики Сербиї. Окрем же така инициятива артикулує особни, интимни интерес рускей заєднїци, значна є и пре формални причини, понеже од численосци националней заєднїци завиши и очуванє велїх здобутих правох, та и тих сущних як цо школски оддзелєня по руски, медиї, лєбо право на службене  хаснованє язика и писма, од чого пошлїдково завиши и софинансованє националней култури. Бо, дацо од спомнутого, скорей лєбо познєйше будзе загашене як безсмислове, кед го нє будзе хто хасновац.

Кед лєм настала идея о Пододбору за демоґрафию, окрем добрей намири, нєбарз було ясне цо и як вон ма робиц, а дзепоєдни идеї озбильно заґажовали до популизмa и права поєдинца на шлєбодни вибор и приватносц.

Тераз, медзитим, перши конкретни наяви з того Пододбору нагадую же єст витворлїви и практични идеї. Ище важнєйше же ше рушаю у узким просторе медзи потребами и можлївосцами хтори дошлєбодзує закон. Конкретно, по важацим закону, а пре дзепоєдни злохаснованя у векших и политично моцнєйших меншинских заєднїцох, вецей нїхто, окрем Републичней виберанковей комисиї, нє може розполагац анї правиц нїяки лїстини по националним ключу, а за зверлївосц особних податкох гражданох Сербиї,  достатих на попису, ґарантує Републични завод за статистику, закони и Устав. Добре же Пододбор то бере як аксиом у роботи, а опредзелєни є потребни податки зберац компаративно зоз явних жридлох, цо чежша, алє леґитимна опция. У медзичаше, дзепоєдни идеї и конкретни активносци хтори ше зявели у обласци роботи того Подобору, як цо синхронизованє рисованих филмох, авдио-кнїжки за дзеци, лєбо орґанизовани превоз наймладших членох новосадского РКЦ, вшелїяк треба привитац.

(Опатрене 116 раз, нєшка 1)