СЛАВКО РОМАН РОНДО

СЛАВКО РОМАН РОНДО народзени 21. октобра 1968. року у Кули. Основну и штредню школу закончел у Руским Керестуре, а дипломовал на Педаґоґийней академиї у Зомборе (1992).

Славко Роман препознатлїви и експоновани представитель керестурскей субкултури осемдзешатих рокох. Бул ди-джей, автор текстох и басиста култней ґрупи „Армитон”, як и порушовач вецей музичних проєктох ґрупох „Анастазия” (1994) и „Атлантида” (2001). Музику и тексти писал за сербски денс шпивачки Лидию Првулович и Весну Ґалиот Ґалу.

Першу кнїжку поезиї „Катаклизма” (1989) обвявела му НВУ „Руске слово”. Штредком дзеведзешатих у Руским Керестуре порушал алтерантивну театралну ґрупу котра одбавела два представи на його тексти: „Боемска рапсодия” (1995) и „Гайзибан за Остановци” (1996). 

Достал награду за найкрасши текст „Ґрош” („Червена Ружа”, 1994), а тиж и вецей награди на „Керестурияди” (зоз ґрупу „Трансилвания” 1982. и зоз ґрупу „Армитон” 1986).

Кнїжки поезиї „Одняти од псох” (2019) и „З видлами до шиї” (2020) тиж видала  НВУ „Руске слово”.

Од 2009. року жиє и роби у Канади. Ту закончел Академию за аудио знїманє (ТАРА) 2012. року.

За себе гвари же є „до шмерци зарекнути Маковчар”.