„Сримска забивачка и колбасияда” у Шидзе

автор Вл. Дїтко 20. фебруар 2016

На забивачки ше оценьовало квалитет швижей и сухей колбаси, отримани змаганя у швидким фаластованю швинї и єдзеню колбаси, а на манифестациї були и госци зоз иножемства

Прешлей соботи и нєдзелї, 13. и 14. фебруара, у Шидзе отримана традицийна туристично – привредна манифестация 19. по шоре „Сримска забивачка и колбасияда” хтора и того року позберала змагательох и числених патрачох. Манифестация по традициї почала зоз змаганьом у швидким фаластованю и обробяню меса уж зарезаню швинї. Нажаль, змагали ше лєм два екипи „Аґропапук” и „Митин млїн”, хтори уж традицийно участвую. По правилу, змаганя почина аж кед ше швиня опалї и ошкрабе, подзвигнє на рам, и теди судия дава знак за початок. Фаластованє швинї ше закончує зоз правеньом трох колбасох хтори ше на концу змаганя обеши же би их шицки видзели.

Екипи „Аґропапуку” требало 3,30, а екипи „Митиного млїну” 3,32 минути. Медзитим, окрем швидкосци, хтора найцикавша за патрачох, спрам пропозицийох и фалати меса муша бул квалитетно обробени так же фахова комисия потим препатра роботу, оценює, и „каребни” поени, додава як секунди на посцигнути час. Кед комисия закончела оценьованє, вишло же побиднїк екипа „Митин млїн”, хтора на концу мала час од 6,5 минути, а екипа „Аґропапук” 7,4 минути.

Цикаве було и змаганє хто скорей поє метерову колбасу порезану на фалатки. Приявели ше пейцме змагателє, шицки хлопи. Колбасу за 2,52 минути, поєдол Милан Янкович зоз Беоґраду. За кажди случай, ту була и медицинска екипа Дома здравя Шид, алє на щесце, вони нє мушели интервеновац.

Истого дня отримане и змаганє у продукциї швижих колбасох. Змагали ше коло 10 екипи, а по оцени фаховцох, найлєпши колбаси випродуковала екипа хтору предводзел Йовица Буроєвич, друге место совоєл Славко Ристич, а треце Небойша Петрич. Другого дня манифестациї було змаганє у продукциї сухих (осушених) колбасох. За змаганє були приявени 36 колбаси.

Опрез Спортского центру, дзе ше манифесатция отримовала, були штанди зоз месовима продуктами у котлох ше випражовала масц, пражело колбаси, було и вина, а ище лєпшому розположеню допомогли и гудаци. Окрем госцох зоз Словацкей Републики, до Шиду пришли и госци зоз Словениї зоз Целя и Самобору, та и Хвару зоз Републики Горватскей.

КОЛЯЧКИ ЯК ДАКЕДИ

Єдну екипу мали и Руснаци зоз Бикичу у хторей свойо знанє и схопносци о продукциї колбасох указали и госци зоз Бардейова зоз Словацкей Републики на чолє з начальнїком Мирославом Буйдом. Пан Буйда нам гварел же ше вони дзечнє прилапели змагац, бо и у Словацкей маю подобни нагоди на хторих ше указує як ше орґанизую забивачки и обичаї вязани за тоту роботу, же би млади знали як ше дакеди жило и робело и же месово продукти нє лєм зоз маркетох (предавальньох).

(Опатрене 163 раз, нєшка 1)