Тидзень руского язика и култури на Штранду

автор нах/там 29. юлий 2015

У рамикох Манифестациї „Под корунами на Штранду – медиї, уметносц и спорт”, од пондзелку 27. юлия по соботу 1. авґуст отримує ше тидзень руского язика и култури.

На роботньох з руского язика и култури през пейц днї, дзеци возроста од 5 до 12 роки, маю нагоду дньово научиц по 10 слова по руски. Дзеци хтори сцу участвовац у квизу преверйованя знаня з руского язика на роботнї муша присуствовац найменєй три раз. Квиз будзе отримани на соботу, 1. авґуста на 18 годзин. На квизу буду заступени и даскельо питаня о Европскей униї, з оглядом на тото же партнер манифестациї EU Info Point котри каждого пондзелку од 19-19,30 годзин орґанизує роботнї о Европскей униї.

Того тижня у фокусу и промоция тижньових новинох „Руске слово”, друкованого медия и його онлайн виданє www.ruskeslovo.com хторе понука хасновательом информациї о подїйох з рускей заєднїци у Войводини. Тиж так, з отвераньом рубрики вистох на сербским язику, информациї доступни ширшей публики, зоз чим „Руске слово” постало активни учашнїк у явним диялоґу.

Манифестация „Под корунами на Штранду” почала 13. юлия, будзе тирвац по 16. авґуст, а перши тидзень бул пошвецени мадярскому язику. По 15. авґуст буду ище тидзень словацкого и тидзень румунского язика и култури.

Орґанизатор манифестациї Библиотека городу Нового Саду, Херор Медия Понт и Центер за розвой меншинских и локалних медийох.

(Опатрене 260 раз, нєшка 1)