Три интервенциї у єдним дню

автор Лю. Рац 25. юлий 2015

У Новим Орахове под час жатви Добродзечне огньогасне дружтво „Факля” було нєпреривно дежурне. Жатва закончена концом прешлого тижня, а огньогасци под час жатви три раз поволани же би интервеновали, и шицки три поволанки були у єдним дню.

Перша поволанка сцигла вчас рано. Доявене же обачени густи дим у хотаре ґу Ґунарошу. Огньогасци вишли до хотара, алє нє видзели нїяки дим. Обишли цалу часц хотара, консултовали ше зоз Општинским штабом у Бачкей Тополї, и вец ше врацели назад до валалу.

Коло поладня огньогасцох знова волали же гори огень. На парцели од даскельо гектарох жеми трактор пресовал сламу, и найвироятнєйше од жирячки, лапела ше слама. Огньогасци зоз Орахова перши вишли на польо, и почали гашиц огень. Ґу нїм ше приключели огньогасци зоз Бачкей Тополї, и огень швидко загашени. Погорело дас два гектари слами.

Лєм цо ше врацели назад, сцигла поволанка зоз торньошского хотару – горела табла жита. Огень ше, найвироятнєйше запалєл од искри, понеже огень рушел од бандери, котра доконца и згорела. Тиж, так и дроти ше потаргали и спадли на жем, та грожело вельке нєщесце. Новоораховчанє швидко интервеновали и ище раз були успишни.

На концу, за свойо анґажованє, швидки и ефикасни интервенциї, достали припознанє од Општинского штабу процивогньовей защити у Бачкей Тополї.

(Опатрене 69 раз, нєшка 1)