Турнир освоєли Крущичанє

автор В. Сеґеди 2. авґуст 2015

Прешлого викенду одбавени полуфинални и финални змаганя на ноцним турниру у малим фодбалу у Руским Керестуре. Побиднїки екипа „Лас Палмас” зоз Крущичу.

 Прешлого пиятку одбавени полуфинални змаганя ноцного турнира у малим фодбалу у Руским Керестуре. У пионирскей селекциї бавели екипи: „Добри момци” (зоз оджацкей општини) – „Будучносц – Глобирк”  (зоз Савиного Села) 0:3 (0:1). Мож повесц же екипа зоз Савиного Села лєгко звладала и надбавела  екипу зоз Оджаку.

У другим полуфиналним змаганю у пионирскей селекциї бавели два керестурски екипи: „Янґ бойс” – „Анатиталанти” 4:0 (1:0). Ґоли за побиднїцку екипу дали: Матей Саянкович 2, а Стефан Тома и Иван Чизмар по єден.

Так ше у пионирскей селекциї до финала пласовали екипи: „Янґ Бойс” и „Будучносц – Глобирк”.

У сениорскей конкуренциї у полуфиналних змаганьох бавели екипи: „Клуб 10” – „Лас Палмас” (Крущич) 1:3 (1:0). Керестурци дали перши ґол. Стрилєц бул Иґор Грнчяр и то бул резултат зоз хторим ше пошло на одпочивок. У другим полчасу Крущичанє подполно надбавели Керестурцох и зоз ґолами Човина, Кишюгаса и Сушича постали перши финалисти.

У другим полуфиналним змаганю сениорох бавели екипи: „Тапетария Еуро”  – „Глобирк Ґрупа” 7:5 (2:3).

Змаганє було барз добре, посцигнути вельо ґоли, а Керестурци победзели после цалком иншак орґанизованого бависка. Екипа зоз Србобрану нє знала як поставиц бависко и домашнї  заслужено победзели. Интересантне надпомнуц же после посцигнутих двох ґолох, Србобранцом ше поспишело вировнац резултат и водзиц зоз 3:2. Но, таки резултат нє тирвал длуго, бо Керестурци пошвидко вировнали резултат, а потим и водзели зоз 7:3. При концу змаганя госци дали ище два ґоли за конєчни резултат 7:5 за Тапетарох. Ґоли за побиднїцку екипу дали: Стефан Бранкович 3, Давид Катона 3 и Боян Бранкович.

Екипа „Тапетария Еуро” зоз тоту прешвечлїву побиду постала други финалиста на тогорочним турниру у Руским Керестуре.

ФИНАЛНИ ЗМАГАНЯ

Тогорочни ноцни турнир у малим фодбалу закончени прешлей нєдзелї, кед одбавени финални змаганя.

У конкуренциї младших пионирох бавели екипи: „Два лїви” – „Адидас” 0:0. После виводзеня пеналох зоз 2:1 победзела екипа „Два лїви”. За освоєне перше место на турнире од орґанизатора достали маїци, а найлєпши ґолман, бавяч и ґолґетер достали спортски ташки.

У финалним змаганю у конкуренциї пионирох бавели екипи: „Янґ Бойс” – „Будучносц – Глобирк” 1:0 (1:0).

Тото змаганє ришене у першим полчасу, а єдини ґол дал Матей Саянкович. Награди за успих найлєпшей екипи, ґолманови, бавячови и ґолґетерови були исти як и при младшей конкуренциї.

У сениорскей конкуренциї у змаганю за треце место бавели екипи: „Глобирк – Ґрупа” – „Клуб 10” –  3:1 (3:0). Екипа зоз Србобрану змаганє ришела ище у першим полчасу, а єдини ґол за „Клуб 10” дал Иван Рац.

У финалним змаганю за перше место на тогорочним турниру бавели екипи: „Лас Палмас” (Крущич) – „Тапетария Еуро” 6:4 (4:0).

Крущичанє нашвидко дали штири ґоли и зоз тим резултатом и закончени перши полчас. У другим полчасу ше Керестурци дакус таргли и змаганє постало нєизвесне, бо резултат бул 4:3 и 5:4. Но, заш лєм ше по конєц екипа „Лас Палмас” виборела за побиду. Ґоли за побиднїцку екипу дали: Човин 3, Надь 2 и Сушич, а за керестурску екипу ґоли дали: Бранкович 2, Катона и Чапко.

Так перше место на турниру завжала екипа „Лас Палмас”, друге место припадло екипи „Тапетария Еуро”, а треце екипи „Глобирк – Ґрупа”.

За найлєпшого ґолмана преглашени Йовица Каленич („Лас Палмас”), найвецей ґоли дал Давид Катона, а за найлєпшого бавяча преглашени Боян Бранкович. Найлєпшим поєдинцом окремни награди уручели Борис Шайтош и Славко Ґовля спред орґанизаторох. Пенєжни награди найлєпшим екипом на турнире уручел предсидатель СД „Русин” Драґан Ковачевич.

Финални змаганя на тогорочним турниру у Старей школи провадзели вецей як 500 нащивителє. По указаним бависку и нащиви тогорочни ноцни турнир бул успишни. Тирвал 15 днї, а кажди вечар ше нащивительом додзельовало награди на томболи. Медийни спонзор турнира була НВУ „Руске слово” Нови Сад.

СОСТАВ НАЙЛЄПШИХ ЕКИПОХ 

  1. „ЛАС ПАЛМАС” – Каленич, Тошич, Вукович, Човин, Крзнар, Ґрдинич, Кишюгас, Надь, Сушич.
  2. „ТАПЕТАРИЯ ЕУРО” – Няради, Б. Бранкович, С. Бранкович, Малацко, Катона, Будински, Колбас, Чапко.
  3. „ГЛОБИРК – ҐРУПА” – Маґлайчевич, Зелич, Ранкич, Трипич, Михайлович, Плавшич, Ґибунович, Шпанович, Янїч, Икрашев.
  4. „КЛУБ 10” – Б. Гарди, Д. Югик, Б. Орос, Чизмар, Павлович, Грнчяр, Рац.

 

(Опатрене 102 раз, нєшка 1)