Упокоєл ше о. Михайло Малацко (1955-2021)

автор в. римар
816 Опатрене

РУСКИ КЕРЕСТУР – Вчера, 16. септембра, у Руским Керестуре, нєсподзивано ше у 67. року живота, упокоєл  парох керестурски и катедрални, протоєрей ставрофор о. Михайло Малацко.

Народзени є у Руским Керестуре 28. фебруара 1955. року од оца Йоакима и Леони. У Керестуре закончел основну школу, а ґимназию  у Риме у Українскей Папскей семинариї святого Йосафата. У Риме почал и  студиї дзе закончел  два роки филозофиї,  а вец прешол до Заґребу на теолоґию. Маґистровал  у Риме,  на тему о владикови Дионизийови Нярадийови.

Оженєл ше зоз  катехеткиню, Златицу Буїла, зоз хтору мал тройо дзеци: Кристину,   Дионизия и  Тадея. Виховали и панїматково шестри хтори остали широти: Мануелу, Саню, Марияну и Владимиру.  За священїка  го пошвецел владика крижевски кир Славомир Микловш  18. септембра 1994. року у Руским Керестуре.

Такой бул меновани за капелана  у Руским Керестуре,   и на тей служби бул  до октобра 1999. року. Теди бул меновани за  пароха у Шиду, а 2003. и за  декана сримского. У Шиду  обновел парохиялни дом и у велькей мири  владическу лєтну резидецию у хторей ше находзи  и наша церква Преображеня Господнього.

Од 15. авґуста 2008. року поставени є за пароха керестурского и катедралного,  з оглядом же  керестурска церква святого Миколая,  зоз формованьом Апостолского еґзархату за грекокатолїкох у Сербиї и Чарней Гори  2003. року  достала статус катедралней церкви.  Дня 6. децембра 2008. року отец Малацко меновани за  протоєрея ставрофора.

И у Керестуре обновел  церкву святого Миколая, а у єй фундаментох збудовал окремну крипту за наших  упокоєних владикох.

Ище  як богослов  преложел на руски язик и  за друкованє пририхтал Илустровану библию за младих  хтора обявена 1989. року.

Бул ношитель духовного живота у керестурскей парохиї, а и ширше и дал вельке доприношенє у роботи Каритасу и Християнского часописа Дзвони.

Сочувствиє фамелиї годно виявиц нєшка од 14 годзин на далєй у церкви.

Заупокойна служба  Божа  зоз єрейским хованьом почнє у катедралней церкви  святого Миколая у  Керестуре на соботу, 18. септембра на 10 годзин пред поладньом, а поховани будзе на керестурским теметове.  

Вичная памят!

ПОВЯЗАНИ ТЕКСТИ