Уф, тота трема…

автор Анамария Ранкович
301 Опатрене

Чао мили пайташе! У прешлим периодзе ше збули два подїї – Стретнуце рецитаторох у Кули и Драмски мемориял у Руским Керестуре на хторим дзеци ґлумели представу за дзеци „Бал”. Шицки були феноменални. Аж сом роздумовала чи мали трему, бо публика нїч нє обачела. И прето настала тота емисия.

А цо то трема? Хто ю може мац? Як ше теди чувствуєце? То ме интересовало. Охабели сце на мнє барз красни упечаток же як добре роздумуєце о треми.

О тим сом бешедовала зоз Михайлом Копчанским, Надю Ґайдош и Филипом Буилом зоз ОШ „Братство єдинство” зоз Коцура, як и ґлумицами представи за дзеци Яну Варґа, Ксению Катрина, Маю Надь и Валентину Гарди.

Михайло ми гварел же ше йому „якош сцагнє брух и як кед би зацерпнул”. Филип кед видзе на бину и кед видзи же го вельо людзе слухаю дакеди випове тото цо ма цо швидше може, же би цо скорей зишол з бини. Надї ше круци по глави же ше барз збунї и горуцо єй барз кед ю лапи трема.

Мая ше, кед вишла на бину пооблєкана як принцеза, тресла од треми, тресли ше єй руки. Гвари же ше вельо раз збунєла. Валентини почало барз шерцо лупкац и подумала: „Цо мам тераз робиц кед увидзим тих силних людзох у сали?” Понеже ґлумела дяблика, почувствовала же ше єй видли тресли. Яна уж ма вельо искуства у наступох, понеже и рецитує, та ю нє лапела моцна трема и дакус єй шерцо моцнєйше дуркало. Ксения чувствовала же ше єй сукня треше од треми.  

А як ше шицки вони боря з трему? Шицки заключели же после одредзеного часу, трема попущела и же наступац нїч нє страшне. А подзелєли и даскельо совити:

Михайло кед нє пове добре слово, лєбо погриши просто предлужи так як зна, односно импровизує. Филипови помага, пред тим як видзе на бину, два раз глїбоко удихнуц и видихнуц. Надя окрем диханя сама себе пове: „Я то знам! Я то можем! Поспиши ше ми поробиц тото цо сом надумала!”

Яна гвари же кажде треба же би нашол свой способ на хтори зблага трему: „Може поєсц чоколадку, напиц ше води, лєбо чишлїц до 10”. Вона найволї шпивац у себе облюбену шпиванку и на таки способ себе злєпша и розтерхує моменти пред наступ. Мая тиж люби шпивац у себе и роздумує: „Кед сом нє мала трему на проби, чом бим тераз мала?” Окрем того совитує вам же бисце импровизовали, а нє станули кед ше збунїце, бо публика нє зна точни текст хтори маце вигвариц. Валентина роздумує же то нїч нє страшне и нє патри до публики, алє доокола. Ксениї мац посовитовала же би трему преруцела до позитивного и вона ше того тримала и себе то вше гуторела.

Емисию за дзеци можеце послухац и на тим линку https://media.rtv.rs/rsn/emisija-za-decu-rusinski-rns3/80481

ПОВЯЗАНИ ТЕКСТИ