РУСКИ КЕРЕСТУР – У парохиї св. оца Миколая, вчера, 8. септембра означене швето Рождество пресвятей Богородици – Мала Матка Божа. На Служби Божей у Водици пошвецена икона На драги до Емаусу.
Швето означене на Литурґийох у церкви на 8 и 19 годзин, як и у Водици на 10 годзин. Служба Божа була на 17 годзин и у манастире Малих шестрох дзе преслaвени Кирбай їх каплїци.
Службу Божу у Водици сужели парох о. Владислав Варґа и капелан о. Ярослав Варґа, а капелан о. Владимир Медєши споведал вирних. Вон тиж и наказовал о значеню того швета кед Бог дал на швет Марию єй родичом у барз позних рокох, котра познєйше постала Мац Исусова.
На Служби було красне число вирних, а були и представителє Ротари клубу зоз Кули , котри до Водици подаровали икону наволану На драги до Емаусу.
Икона, хтору намальовала академски иконописателька Йована Дюричкович зоз Червинки, наменєна Центру Емаус. Икона димензийох 100х80 цм, а финансовал ю Ротари клуб на чолє з инициятором и предходним предсидательом Михайлом Тиркайлом з Руского Керестура, а рам донирал Михайло Катона, стаклар тиж Керестурец.
