ДЮРДЬОВ – Вчера, 23. октобра опрез памятнїка погинутим борцом НОВ у парку у центру валала з минутку цихосци почало здогадованє на Дзень ошлєбодзеня Дюрдьова и його жертви.
Предсидателька Совиту месней заєднїци Дюрдьов Душанка Джамбас поволала присутних же би зоз минуту цихосци дали почесц шицким жертвом, а потим валалски православни священїки – старшина православного храму о. Петар Дюкич и о. Радоє Маркович опрез памятнїку служели парастос, а дзеци старшого возросту валалскей основней школи на сербским язику пречитала стихи Йована Йовановича Змая „Швицаци гроби”. Потим предсидатель СУБНОР зоз Жаблю Светозар Злоколица гуторел о податкох, подїйох, нємилих случованьох з войни и о ошлєбодзеню местох општини котре ше случело пред седемдзешат пейц роками.
На означованю того значного дня були гражданє котри почитую шмели рухи Дюрдьовчанох, родзина и їх найблїзши, представителє локалней власци, валалскей основней школи и грекокатолїцки священїк о. Михаил Холошняй.
