У комисийох седмеро Керестурци

автор сен 27. авґуст 2016

На схадзки Скупштини општини верификовани мандати новим одборнїком и вибрани предсидателє, заменїки предсидателя и члени вецей комисийох СО Кула.

На дньовим шоре другей по шоре схадзки Скупштини општини Кула у новим зволаню, хтора отримана 18. авґуста, принєшени даскельо кадрово пременки на вецей уровньох. Одборнїки СО верификовали мандати новим одборнїком꞉ Саши Ґолочорбин (СНС), Ливиї Козма (СВМ) и Саши Проле (Руска странка). Понеже одборнїк Сербскей радикалней странки Тихомир Дюричич поставени на функцию помоцнїка предсидателя Општини Кула, вон дал задзекованє, а место нього за одборнїка СО меновани Срдян Попович. Задзекованє, пре приватни причини дал и Иштван Рока зоз СВМ, та место нього меновани Жолт Ґоґа.

На схадзки вибрани предсидатель, заменїк предсидателя и члени Комисийох СО Кула, члени Штабу за позарядово ситуациї, потим Управного и Надпатраюцого одбору Центру за социялну роботу, та членох Школского одбору, а до роботних целох вибрани и даскельо Керестурци.

Окрем Владимира Варґу, котри ище скорей поставени до Комисиї за кадрово и административни питаня и роботни одношеня, до Комисиї за статутарни питаня, орґанизацию и нормативни акти СО Кула вибрана Єлена Сивч, а до Комисиї за представки и жалби Мария Шепински, котра окончує функцию предсидательки того цела. У Комисиї за урбанизем, квартельну и комуналну дїялносц и защиту животного штредку Борис Шайтош, котри и заменїк предсидателя Комисиї, а у Комисиї за одношеня зоз вирскима заєднїцами керестурски парох о. Михайло Малацко. Иґор Надь и Александар Тасич вибрани до Комисиї за дружтвену дїялносц.

На схадзки Скупштини општини Кула задзекованє дал член Општинскей ради Александер Кочиш, а на идуцей схадзки будзе вибрани нови член Ради, гварел предсидатель Скупштини општини Кула Велибор Милоїчич.

Одборнїк СПС Велибор Васович на схадзки визначел же власц и опозиция треба же би сотрудзовали и приведли до општини инвеститорох, хтори обезпеча роботни места за наших гражданох. Васович вимагал же би служби локалней самоуправи пририхтали звит о чишлє придатих и витворених проєктох зоз хторима општина конкуровала на висших уровньох власци.

(Опатрене 189 раз, нєшка 1)