КОЦУР – У орґанизациї Подручней канцелариї Националного совиту Руснацох у Коцуре и КУД „Жатва” всоботу, 22. януара, з пригодну програму, присподобену актуалней епидемийней ситуациї, означене Националне швето Руснацох.
Локална преслава Дня Руснацох отримана у просторийох Подручней канцелариї Националного совиту Руснацох. Официйна програма почала зоз гимну держави Сербиї, а потим шлїдзела и святочна писня Руснацох „Браца Русини”.
Предсидателька КУД „Жатва”, и координаторка Подручней канцелариї у Коцуре Мелания Мали, на самим початку привитала шицких присутних, а здогадла их и на нашу историю, присельованє Руснацох на тоти простори и насельованє Коцура, як и на значенє самого швета.
Потим наступели и школяре руских оддзелєньох, трецей и штвартей класи Основней школи ,,Братство єдинство” котри за тоту нагоду одшпивали вецей писнї, одрецитовали даскельо писнї и пречитали тексти. За тоту програму их пририхтали їх учительки Славица Чельовски и Валерия Папуґа.
Присутней публики у Руским доме ше после дзецинских точкох представела и Мария Горняк котра одрецитовала єдну писню, а кажда точка була наградзена з моцним аплаузом.
Означованю Националного швета Руснацох у Коцуре представнїки Националного совиту Руснацох, представнїки КПД ДОК – Нови Сад, як и представнїки числених других коцурских орґанизацийох и институцийох.
По законченей програми отримани коктел котри пририхтали орґанизаторе, дзе шицки присутни препровадзели ище пар хвильки у бешеди и друженю, слухаюци руску музику.
