Чи ше Европа може редефиновац

автор там 1. октобер 2015

Пияти Беоґрадски безпечносни форум под назву „Може Европа редефиновац себе?“ отримує ше од 30. септембра по 2. октобер у Беоґрадзе и пошвецени є „горуцим” питаньом реґионалней и медзинародней вонкашнєй политики, безпечносци и економиї.

Орґанизаторе схода, хтори ше отримує у готелу Гаят, Беоґрадски фонд за политичну окремносц, Европски рух у Сербиї и Беоґрадски центер за безпечносну политику.

Урядово особи хтори приноша одлуки, як и блїзко 100 еминентни фаховци зоз реґиона, Европи и цалого швета намагаю ше дац одвити на питаня: на хтори способ Европа реаґує на актуалну габу миґрацийох и вше векшу исламску заєднїцу знука Старого континента, хтори ефекти українскей кризи и резултатох европского модела управяня, як и кельо ОЕБС нєшка порихтани одвитовац на безпечносни спокуси.

Основни циль конференциї же би порушала дебату у напряме заєднїцкого розуменя и ришованя ґлобалних безпечносних проблемох. З тей нагоди орґанизаторе Форума на отвераню обявели „Беоґрадски апел“ з хторим поволали Европску унию  най до  утвердзованя вкупней политики миґрацийох активно уключи Сербию и други балкански держави и най их препозна як партнерох у заєднїци хтора ришує проблеми.

Перши дзень Форуму традицийно почал зоз академским сходом на тему: Чи Европи потребна вонкашня политика. Того дня отримани ище седем дискусиї на хторих бешедоване о нормализованю одношеньох Косова и Сербиї, корпоративней безпечносци, ЕУ як мировним проєкту на Заходним Балканє, росту худоби и нєєднакосци, габи радикализациї, родней ровноправносци и инклузивним дружтве.

Главни теми другого дня: улога ОЕБС у управяню зоз конфликтами, будучносц политичного исламу у Европи и криза у України, Нємецка як лидер Европи, предстояци НАТО сход у Варшави, алє и виволаня управяня зоз сектором приватней безпечносци у транзицийних дружтвох.

На специялней подїї у Скупштини Городу Беоґрад бувши министер вонкашнїх дїлох Норвежскей Торвалд Столтенберґ будзе преглашени за почесного граждана Беоґраду.

Треци дзень конференциї за теми ма: злєпшанє европского модела управяня, яке медзинародне ушоренє сце Русия, нєуспих миґрацийних политикох и нови способи за експлоатацию енерґиї.

Беоґрадски безпечносни форум ма пейц стратеґийних партнерох и реализує ше зоз потримовку 18 домашнїх, реґионалних и медзинародних компанийох, фондацийох, институцийох, орґанизацийох, як и медийох, уключуюци портал ЕурАктив Сербия.

Новини „Руске слово“ медийни партнер Пиятого Беоґрадского безпечносного форуму. Лоґо НИУ „Руске слово“ находзи ше на линку:   https://www.belgradeforum.org/organization/organizers-partners.html.

02 belgrade 01

(Опатрене 102 раз, нєшка 1)