ВУКОВАР – У орґанизациї Координациї рускей националней меншини Републики Горватскей, всоботу, 23. мая, у Городским музею у Вуковаре отримана Централна Шветочна Академия з нагоди преслави Дня Руснацох у Републики Горватскей (РГ). Дзень Руснацох у Горватскей 25. май, як здогадованє на датум кед 1836. року основана перша грекокатолїцка парохия у Петровцох и централну академию ше отримує на найблїзшу соботу тому датуму.
Шесте означованє Дня Руснацох почало з клядзеньом венцу при Крижу на улїву Вуки до Дунаю и молитву, хтору предводзел петровски парох о. Владимир Седлак, а Шветочна Академия отворена з интонованьом гимни Републики Горватскей и Шветочней шпиванки Руснацох у Горватскей „Браца Русини”, хтори одшпивали Женска шпивацка ґрупа КУД „Яким Ґовля” з Миклошевцох и Хлопска шпивацка ґрупа КУД „Яким Гарди” з Петровцох, под дириґенством Ани Бучко.
У мено Координациї рускей националней меншини РГ визначних госцох, медзи котрима бул и Желько Ковач, предсидатель Вивершного одбору Националного совиту Руснацох у Сербиї, привитал подпредсидатель Ради рускей националней меншини Вуковарско-сримскей жупаниї Борис Бучко. У мено Собору РГ, Дзень Руснацох повинчовал соборски заступнїк и висланїк предсидателя Собору Йосипа Леку Дамир Римац, а у мено крижевского владики, кир Николи Кекича о. Владимир Маґоч. Соборски заступнїк и рускей националней меншини Велько Кайтази послал винчованку.
Шветочносц отримана под покровительством жупана Вуковарско- сримскей жупаниї Божу Ґалича, а у його мено присутних на Академиї привитал його висланїк, дожупан Дьордье Чурчич.
Медзи визначнима госцами були и член Совиту за национални меншини РГ Звонко Костелник, Представитель рускей националней меншини Городу Заґреб Ириней Мудри, Представителька рускей националней мнешини Осиєцко-бараньскей жупаниї Агнетка Балатинац, предсидателька Ради рускей националней меншини Городу Вуковар Лела Дїтко, предсидатель Ради рускей националней меншини Општини Боґдановци Яким Вашаш, предсидатель Ради рускей националней меншини и доначалнїк Општини Томповци Мирослав Лїкар, доначалнїк Општини Боґдановци Ярослав Медєши, предсидателька Союзу Русинох РГ Дубравка Рашлянин, петровски парох о. Владимир Седлак, як и векшина предсидательох руских КУД и здруженьох у Горватскей.
На пригодней програми участвовали шпиваче КУД Руснацох Осиєк, КУД „Яким Говля” з Миклошевцох, Хлопска шпивацка ґрупа КУД „Яким Гарди” з Петровцох, КД Руснацох з Винковцох, Шпивацка ґрупа Дружтва Руснак з Петровцох, як и соло-шпивачка Ивона Гнатко, а на ґитари ю провадзел Мирослав Костелник.
Вибор з поезиї руских писательох з Горватскей рецитовали Денис Гарди, Мая Гарди, Тена Голик, Ивабаан Лїкар и Боян Кошутич, док Томислав Рац и Владимир Дудаш интерпретовали „Грих” Михала Ковача. Конферансу водзели Мануела Дудаш и Иван Будимчич.
По Академиї у просторе Городского музею пририхтани скромни банкет и друженє Руснацох з рижних местох у Горватскей.
