Шицки маме правo витворйовац свойо права

автор Сенка Надь 11. октобер 2015

Студенти права, млади дипломовани правнїки и адвокати зоз цалей Сербиї ше на семинаре з тему „Бранїтелє и бранїтельки меншинских правох у Сербиї” едуковали о людских правох и проблемох у дружтве як цо дискриминация меншинских ґрупох. Семинар отримани од 8. по 13. септембер, а медзи двацецерима учашнїками була и млада адвокатка Силвия Орос зоз Руского Керестура.

Силвия Орос нєдавно положела правосудни испит и почала робиц як адвокатка, а на семинар ше приявела самоинициятивно, пре тему –положеня и права националних меншинох.

– Понеже сом на початку професийней кариєри, приявела сом ше на тот семинар же бим себе приблїжела тоту тему, понеже ше у образовней системи нє виучує як окремни предмет. Думам же тема значна за шицких людзох у Сербиї, а за мнє окреме, понеже и я припаднїца националней меншини – гвари Силвия.

Циль едукациї бул пременїц свидомосц о меншинских ґрупох, од микро по макро уровень, з лоґику же пременки рушаю од поєдинца, та ширше. Окрем младих сербскей националносци, на едукациї були и припаднїки ромскей, албанскей и рускей националней меншини.

НАЙВЕЦЕЙ ПРЕДРОЗСУДКИ О РОМОХ И ЛҐБТ ПОПУЛАЦИЇ

Учашнїки обробели теми людских и меншинских правох и Сербиї и у швеце, а єден зоз проблемох хтори ше визначел то дискриминация, окреме родна дискриминация и стереотипи о Ромох. Була интересантна и дискусия о ЛҐБТ популациї, на хторей бул Ґоран Милетич, активиста за людски права и член Орґанизацийного одбору Паради пихи.

Же би себе приблїжели таки ситуациї у хторих присутна дискриминация, млади правнїки мали роботнї „Театер гнобених” на хторих зоз скечами обрабяли теми о правох меншинох.

– Моя ґрупа мала приказац ситуацию у хторей ваготна жена приходзи на розгварку за роботу, биоґрафия єй перфектна, алє кед роботодаватель видзи же чека бебу, гутори єй же конкурс заварти. Ми през ґлуму розрабяли рижни теми, кажде ше могол уключиц до приповедки и пременїц цек дїї – бешедує Оросова.

У складзе зоз актуалнима случованями, учашнїки едукациї дознали о людских правох у позарядових ситуацийох, дзе нєзаобиходна тема  була и ситуация миґрантох.

– Миґранти котри сцекаю зоз своєй жеми у хторей война, по медзинародних правох маю право шлєбодно преходзиц през держави, а гранїци ше нє шме заверац. Вони можу питац азил у жемох у хторих жадаю, а у транзитних жемох маю право пребувац у часовим периодзе хтори реґуловани зоз законом – гвари млада правнїца.

Robotnja

РУСНАЦИ НЄ ЦАЛКОМ ХАСНУЮ СВОЙО ПРАВА

– Руснаци маю вельо права за хтори нє знаю и хтори нє хасную, а єст можебуц и таки хтори нє сцу хасновац. То поведзме виучованє руского язика у штредкох дзе жию Руснаци, дзе ше оддзелєня зменшую, та и гаша, а тото право нам дате по Уставу же бизме го хасновали. Тиж так,  млади котри ше уписую на факултети нє знаю же можу покладац примаци испит на мацеринским язику, односно же ридко хто зна – гвари Силвия и додава же зме шицки єднаки у правох хтори ше нам ґарантує и кажде ма право и можлївосц витворйовац свойо права.

Преподаванє о националних меншинох у Войводини отримал помоцнїк покраїнского секретара за национални заєднїци Янош Орос, та и правнїки котри припаднїки векшинского народу мали нагоду дознац о положеню меншинох и проблемох зоз хторима ше зочую. Од представительох урядових институцийох, привитала их и покраїнска омбудсманка Анико Мушкиня Хайнрик, а були и у Основним судзе, дзе од судийох дознавали о конкретних случайох у пракси зоз хторима ше єдного дня шицки годни зочиц.

Млади правнїки достали задаток отримац преподаванє у школи о правох меншинох, а Оросова поручує младим же би требали знац же зме шицки розлични и треба же бизме були толерантни, бо маме шицки єднаки права.

(Опатрене 114 раз, нєшка 1)