Яки то у Новим Садзе Руснаци?

автор борис варґа 12. децембер 2016

Пред даскельома тижнями „Руске слово” нащивели уважени социолоґове и направели виглєдованє о медийох и Руснацох. Єдно зоз питаньох було и – „Кого бисце видвоєли з визначних Руснацох у Новим Садзе?”. Мойо контра питанє анкетаром було – „З котрей обласци?”.

И наисце, поєдноставиц питанє о Руснацох значи, положиц их под єден калап и закруциц до пасових сукньох. Прето у тим чишлє „Руского слова” млади новинарки з рубрики „Мозаїк” пробовали дознац як ше Руснаци у Новим Садзе рихтаю за 2021. рок, кед тот варош постанє Европска престолнїца култури и чи орґанизаторе тей важней подїї „отворя дзвери” и етнїчним заєднїцом, як цо то Руснаци?

Окреме на тоту тему було вельо розправи кед нєдавно була обявена информация же Нови Сад здобул тоту титулу. И сам варош барз комплексни, та питанє же котри змисти превагню и як орґанизаторе зосцу представиц Нови Сад як – сербску Атину, мултинационалну палету, чи панску Штредню Европу.

И Руснацох у Новим Садзе єст рижних. Єдни ше спатраю лєм на традицию, та думаю же єдзенє и облєчиво цошка цо других прицагує же би ше з нами упознали. Други думаю же тото цо маме указац то людзе и култура – модерна, чи тота котру зме ту, у Войводини, остатнї децениї розвили. Треци, заш, гоч су Руснаци, думаю же тота характеристика менєй важна и маю „пурґерске” одношенє ґу националному питаню вообще, алє активно участвую у явним живоце Нового Саду. Таки трої розлични Руснаци и кед ше зиду за єдним столом, та ше по руски, вельо раз, нє можу згвариц.

Хтошка раз бешедовал о тим же би нам тот феномен лєпше могла потолковац Стратеґия култури Руснацох. Други гваря же то нє потребне, бо Войводина и Нови Сад ище вше даваю простор за космополитизем. Трецим добре у своїм власним, традицийним просторе и думаю же вон найважнєйши за „обставанє заєднїци”.

Праве титула, Нови Сад – престолнїца култури, би требала и нас нагнац же бизме пробовали дац комплекснєше видзенє самих себе. За початок досц и на єдней трибини, або округлим столє…

(Опатрене 3,706 раз, нєшка 1)